سوشل میڈیا پر سی ایس ایس 2026 کے حوالے سے گردش کرنے والے تمام الزامات بے بنیاد اور من گھڑت ہیں، ایف پی ایس سی

جمعرات 13 اگست 2026 21:03

اسلام آباد (اُردو پوائنٹ اخبارتازہ ترین - این این آئی۔ 13 اگست2026ء) فیڈرل پبلک سروس کمیشن (ایف پی ایس سی)نے سوشل میڈیا پر سی ایس ایس 2026 کے امتحانی عمل، امتحانی شیٹس اور مراکزی تقسیم کے حوالے سے گردش کرنے والی خبروں اور پوسٹس کی سختی سے تردید کرتے ہوئے انہیں بے بنیاد، من گھڑت اور حقائق کے منافی قرار دے دیا ہے۔ترجمان ایف پی ایس سی کے مطابق سوشل میڈیا پر وائرل ہونے والی ایک پوسٹ کا نوٹس لیا گیا ہے جس میں امتحانی شیٹس کے گم ہونے، سکریسی ونگ، شعبہ امتحانات کے ریکارڈ میں بے ضابطگیوں اور بعض اکیڈمیز کے ساتھ مل کر امتحانی مراکزی نشستوں میں ردوبدل کے سنگین الزامات عائد کیے گئے تھے۔

کمیشن نے ان تمام الزامات کو یکسر مسترد کرتے ہوئے واضح کیا ہے کہ ایف پی ایس سی میں امتحانی شیٹس کی وصولی، گنتی، حفاظت اور اجرا کا عمل بالکل محفوظ اور مربوط ملٹی لیئر حفاظتی نظام کے تحت انجام دیا جاتا ہے۔

(جاری ہے)

ہر مرحلے پر تصدیق، دستاویزی اندراج اور افسران کی سخت نگرانی شامل ہے اور اس سلسلے میں کسی قسم کی بے ضابطگی، شکایت یا تضاد کا کوئی ریکارڈ موجود نہیں ہے۔

اکیڈمیز یا کسی تیسرے فریق کے اثر انداز ہونے کا کوئی امکان نہیں۔ امتحانی مراکز کی تشکیل، رول نمبر پلان اور نشستوں کی تقسیم مکمل طور پر خودکار اور شفاف طریقہ کار کے تحت ہوتی ہے جس میں دستی مداخلت کی کوئی گنجائش نہیں ہے۔ ترجمان کا کہنا تھا کہ ایف پی ایس سی تمام امتحانی مراحل میں شفافیت، میرٹ اور غیر جانبداری پر سختی سے کاربند ہے اور کسی بھی مصدقہ شکایت پر فوری کارروائی کی جاتی ہے۔

تمام امیدواروں اور عام عوام سے اپیل کی ہے کہ وہ اس قسم کی غیر مصدقہ اور مقصدیت پر مبنی مہمات پر کان نہ دھریں اور صرف ایف پی ایس سی کے سرکاری ذرائع سے جاری ہونے والی معلومات پر اعتماد کریں۔کمیشن نے واضح کیا ہے کہ وہ ادارے کی ساکھ کو نقصان پہنچانے اور امتحانی نظام سے متعلق بے بنیاد پروپیگنڈا اور افواہیں پھیلانے والوں کے خلاف قانونی چارہ جوئی کا حق محفوظ رکھتا ہے۔