ایس ای سی پی نے ایگرو پروسیسرز کے آئی پی او کی منظوری دے دی، 5 کروڑ 80 لاکھ سے زائد شیئرز کی عوامی پیشکش ہوگی

جمعرات 13 اگست 2026 22:40

اسلام آباد (اُردو پوائنٹ اخبارتازہ ترین - آن لائن۔ 13 اگست2026ء) سیکیورٹیز اینڈ ایکسچینج کمیشن آف پاکستان (ایس ای سی پی) نے ایگرو پروسیسرز اینڈ ایٹماسفیرک گیسز لمیٹڈ کے ابتدائی عوامی پیشکش (آئی پی او) کی منظوری دے دی ہے، جس کے بعد کمپنی پاکستان اسٹاک ایکسچینج میں لسٹ ہونے کی راہ پر گامزن ہوگئی ہے۔ کمپنی کے 5 کروڑ 80 لاکھ 49 ہزار 541 شیئرز عوامی پیشکش کے لیے پیش کیے جائیں گے، جو آئی پی او کے بعد کمپنی کے ادا شدہ سرمائے کا 15 فیصد ہوں گے۔

ایس ای سی پی کے مطابق ایگرو پروسیسرز کا آئی پی او بک بلڈنگ طریقہ کار کے تحت کیا جائے گا۔ پیشکش کیے جانے والے حصص میں سے 75 فیصد ادارہ جاتی اور ہائی نیٹ ورتھ سرمایہ کاروں کے لیے مختص ہوں گے، جبکہ 25 فیصد حصص ریٹیل سرمایہ کاروں کو فروخت کے لیے پیش کیے جائیں گے۔

(جاری ہے)

ایس ای سی پی کے مطابق ایگرو پروسیسرز اینڈ ایٹماسفیرک گیسز لمیٹڈ خوردنی تیل، بناسپتی، صنعتی فیٹس، مارجرین، مصالحہ جات اور ساسز کی تیاری، پراسیسنگ اور فروخت کے کاروبار سے وابستہ ہے۔

کمیشن نے سرمایہ کاروں کو ہدایت کی ہے کہ کسی بھی قسم کی سرمایہ کاری سے قبل کمپنی کے پراسپیکٹس کا بغور جائزہ لیا جائے، بالخصوص پراسپیکٹس میں درج رسک فیکٹرز کو مدنظر رکھا جائے تاکہ سرمایہ کار تمام متعلقہ خطرات اور معلومات سے آگاہ ہوکر فیصلہ کرسکیں۔