نظام مصطفی پارٹی کا پاکستان ،ترکیہ اورسعودی عرب کے درمیان دفاعی معاہدے کا خیر مقدم

یہ سہ فریقی تعاون مستقبل میں تمام اسلامی ممالک کو ایک لڑی میں پرونے کا سبب بنے گا،ڈاکٹر حاجی محمدحنیف طیب

جمعرات 20 اگست 2026 01:16

کراچی(اُردو پوائنٹ اخبارتازہ ترین - این این آئی۔ 20 اگست2026ء) نظا م مصطفی پارٹی اورتنظیم السعید کا مشترکہ اجلاس چیئرمین نظام مصطفی پارٹی سابق وفاقی وزیر پیٹرولیم وقدرتی وسائل ڈاکٹر حاجی محمدحنیف طیب صدارت میں منعقد ہوا،اجلاس میں نظا م مصطفی پارٹی اورتنظیم السعید کے عہدیداران وکارکنان نے شرکت کی ۔اجلاس کے شرکاء نے پاکستان،ترکیہ اورسعودی عرب کے درمیان ’’مکہ جوائنٹ ڈیفنس ایگریمنٹ‘‘ کا خیر مقدم کیا اوراس دفاعی معاہدے کوامت مسلمہ کے اتحادکی جانب ایک تاریخی قدم قراردیا،اجلاس میں اُمید ظاہر کی گئی کہ یہ سہ فریقی تعاون مستقبل میں تمام اسلامی ممالک کو ایک لڑی میں پرونے کا سبب بنے گا ۔

شرکاء کا کہنا تھاکہ یہ اتحاداسرائیل کے خاتمے ،غزہ کی فتح فلسطین کی آزادی کی نوید ہے یہ دفاعی اتحادسے قبلہ اول، بیت المقدس اورمسجد اقصیٰ کوغاصبانہ تسلط سے آزادکرواکر آزادفلسطین کا درالحکومت یروشلم (القدوس)کوبنانے میں اہم کرداراداکرے گا۔

(جاری ہے)

اجلا س میں سیدحامد مختارکاظمی، سیدزبیر احمدسعیدی،تاج الدین صدیقی،پروفیسرسیدنثاراحمد،شمس الدین قریشی،حاجی احمد مجاہد،احسان اللہ صدیقی،مبین بھٹی،مختار قادری، اشرف رشید ،شفیق الدین ،رفیق پاریکھ، سرورمدنی،فضل الرحمان،عارف ریاض، قاری خلیل احمدسعیدی،طیب فیضی سعیدی،الطاف حسین سعیدی،قاری ماجد سعیدی ، انس صدیقی،محمد رضا ودیگر شریک ہوئے ۔

رہنماوںنے اتحاد امت پر زوردیااورکہاکہ پاکستان جغرافیائی اورنظریاتی لحاظ سے عالمی سطح پرایک کلیدی اہمیت کا حامل ملک بن کر ابھر رہاہے۔ انہوںنے قائداعظم محمد علی جناح کے زریں اُصولوں ’’اتحاد،تنظیم اوریقین محکم ‘‘کی اہمیت کواجاگر کرتے ہوئے واضح کیاکہ کلمہ طیبہ کی بنیادپر قائم ہونے والی یہ ریاست مستقبل میں مسلم اُمہ کی قیادت اورخطے میں امن وخوشحالی کی ضمامن بنے گی ۔