یونیورسٹی آف ہیلتھ سائنسز کے ریسرچ بورڈ کا اجلاس

لاہور (اُردو پوائنٹ اخبارتازہ ترین - آن لائن۔ 20 اگست2026ء) یونیورسٹی آف ہیلتھ سائنسز (یو ایچ ایس) نے ماسٹر آف ڈینٹل سرجری (ایم ڈی ایس) کی چار اہم سپیشلٹیز کے 20 سالہ پرانے نصابوں نصاب کو تبدیل کرنے کی منظوری دے دی۔ یہ فیصلہ یو ایچ ایس کے ایڈوانسڈ سٹڈیز اینڈ ریسرچ بورڈ (اے ایس آر بی) کے 229ویں اجلاس میں کیا گیا جو جمعرات کو وائس چانسلر پروفیسر ڈاکٹر نادیہ نسیم کی زیر صدارت منعقد ہوا۔

نظرثانی شدہ نصابوں میں ایم ڈی ایس آپریٹو ڈینٹسٹری، پروستھوڈونٹکس، آرتھوڈونٹکس اور اورل اینڈ میکسیلو فیشل سرجری کے پروگرام شامل ہیں۔ نئے نصاب کا مقصد پوسٹ گریجویٹ ڈینٹل ٹریننگ کو دندان سازی کے جدید رجحانات، معاصر طبی تعلیم کے طریقہ کار اور ماہرینِ صحت کی بدلتی ہوئی ضروریات سے ہم آہنگ کرنا ہے۔

(جاری ہے)

اجلاس کے شرکاء نے ایم ڈی ایس نصاب پر نظرثانی کو ایک طویل عرصے سے زیر التوا اہم قدم قرار دیا۔

نصاب کا جامع جائزہ ماہرین پر مشتمل سپیشلٹی ایڈوائزری کمیٹیوں نے یو ایچ ایس کے شعبہ میڈیکل ایجوکیشن کے تعاون سے مکمل کیا۔ نظرثانی شدہ نصاب کو ہائر ایجوکیشن کمیشن اور پاکستان میڈیکل اینڈ ڈینٹل کونسل کی گائیڈ لائنز کے علاوہ یو ایچ ایس لیول تھری ایم ڈی، ایم ایس، ایم ڈی ایس ریگولیشنز 2024ء کے مطابق ترتیب دیا گیا ہے۔ بورڈ آف سٹڈیز (ڈینٹسٹری) پہلے ہی نئے نصاب کا تفصیلی جائزہ لے چکا تھا اور اس نے نظرثانی شدہ نصاب کو ایڈوانسڈ سٹڈیز اینڈ ریسرچ بورڈ کے ذریعے اکیڈمک کونسل کو بھجوانے کی سفارش کی تھی۔

بورڈ آف سٹڈیز (ڈینٹسٹری) کی کنوینر اور شعبہ میڈیکل ایجوکیشن کی قائم مقام سربراہ پروفیسر ڈاکٹر سارہ غفور نے اجلاس کو نظرثانی شدہ نصاب کے ڈھانچے اور اہم خصوصیات کے بارے میں بریفنگ دی۔ اے ایس آر بی کے اجلاس میں مختلف پوسٹ گریجویٹ شعبہ جات میں تھیسس کی جانچ سے متعلق کیسز بھی زیر غور آئے۔ ان میں مائیکرو بایولوجی، نیفرولوجی، پیڈیاٹرکس، اینستھیزیا، نیورو سرجری، گائناکالوجی و آبسٹیٹرکس، آپتھلمولوجی، آرتھوپیڈکس، تھوراسک سرجری، یورولوجی اور اورل اینڈ میکسیلو فیشل سرجری شامل تھے۔ اجلاس میں پی ایچ ڈی ریسرچ سائنپسسز کے علاوہ ایم ڈی، ایم ایس، ایم ڈی ایس، ایم فل اور ایم ایچ پی ای پروگرامز کے بڑی تعداد میں ریسرچ سائنپسسز بھی زیر غور آئے۔