ًسپریم کورٹ کے فیصلے پر بانی پی ٹی آئی کو رات گئے ہسپتال منتقل کیا گیا: عطا اللہ تارڑ

جمعہ 21 اگست 2026 19:42

اسلام آباد (اُردو پوائنٹ اخبارتازہ ترین - آن لائن۔ 21 اگست2026ء) وفاقی وزیر اطلاعات و نشریات عطا اللہ تارڑ نے کہا ہے کہ سپریم کورٹ کے فیصلے کی روشنی میں بانی پی ٹی آئی کو 20 اور 21 اگست کی درمیانی شب مناسب حفاظتی انتظامات کے تحت ہسپتال منتقل کیا گیا، جہاں ماہرین پر مشتمل ڈاکٹروں کی ٹیم نے تفصیلی طبی معائنہ کیا اور انہیں طبی طور پر صحت مند قرار دیا۔

جس کے بعد انھیں واپس اڈیالہ جیل لے جایا گیا ۔ سماجی رابطے کی ویب سائٹ ’ایکس‘ پر اپنے بیان میں بتایا کہ بانی پی ٹی آئی کو معائنے کے لیے اس ہسپتال میں لے جایا گیا جہاں ماہر امراض چشم، ماہر امراض قلب اور فزیشن سمیت مستند ڈاکٹروں کی ٹیم موجود تھی۔ ڈاکٹروں نے تفصیلی معائنے کے بعد بانی پی ٹی آئی کو طبی طور پر صحت مند قرار دیا۔

(جاری ہے)

ان کی ہمشیرہ محترمہ عظمیٰ خان بھی طبی معائنے اور علاج کے تمام مراحل کے دوران موجود رہیں۔

وفاقی وزیر نے مزید بتایا کہ طبی معائنہ اور دیگر ضروری مراحل مکمل ہونے کے بعد بانی پی ٹی آئی کو 21 اگست کی صبح تقریباً 5 بجے اڈیالہ جیل واپس منتقل کر دیا گیا۔انہوں نے کہا کہ یہ تمام کارروائی سپریم کورٹ کے فیصلے کی روشنی میں مناسب حفاظتی انتظامات کے تحت مکمل کی گئی۔ انہوں نے کہا کہ پی ٹی آئی کے کارکنوں کی طرف سے جو سیکیورٹی صورتحال الشفا ہسپتال اور اس کے باہر پیدا کی گئی اس کے باعث بانی کو پمز لے جایا گیا ۔ انکو پہلے بھی طبی سہولیات فراہم کی جاتی رہی ہیں اور اب بھی جب ضرورت پڑے گی تمام سہولیات دی جائیں گی ۔