چیئرمین سینیٹ سے ملائیشیا کے وزیر داخلہ کی ملاقات، پاک ملائیشیا تعلقات مزید مضبوط بنانے پر اتفاق

جمعہ 21 اگست 2026 20:00

اسلام آباد( آن لائن ) چیئرمین سینیٹ سید یوسف رضا گیلانی سے ملائیشیا کے وزیر داخلہ داتوک سری سید الدین نصر بن اسماعیل نے وفد کے ہمراہ پارلیمنٹ ہاؤس میں ملاقات کی۔ چیئرمین سینیٹ نے ملائیشین وزیر داخلہ کا پرتپاک خیرمقدم کیا اور پاکستان اور ملائیشیا کے دیرینہ تعلقات کو مزید مضبوط بنانے پر زور دیا۔سید یوسف رضا گیلانی نے کہا کہ پاکستان اور ملائیشیا کے تعلقات تاریخی، برادرانہ اور مشترکہ مذہبی و ثقافتی اقدار پر استوار ہیں۔

اعلیٰ سطحی دوروں کے تبادلے سے دونوں ممالک کے تعلقات کو نئی تقویت ملی ہے۔چیئرمین سینیٹ نے کہا کہ پاکستان ملائیشیا کے معزز بادشاہ اور ملکہ کی پاکستان آمد کا منتظر ہے، جبکہ پاکستان ملائیشیا کے وزیر خارجہ کے جلد دورہ پاکستان کا بھی خواہاں ہے۔

(جاری ہے)

انہوں نے مشترکہ وزارتی کمیشن کے آئندہ اجلاس کے جلد انعقاد کی امید ظاہر کی۔سید یوسف رضا گیلانی نے قیدیوں کی بین الاقوامی منتقلی کے معاہدے پر دستخط کا خیرمقدم کرتے ہوئے کہا کہ پاکستان اور ملائیشیا کے بہترین سیاسی تعلقات کو مضبوط تجارتی اور اقتصادی شراکت داری میں تبدیل کرنا ہوگا۔

انہوں نے ملائیشین سرمایہ کاروں کو پاکستان میں سرمایہ کاری کے وسیع مواقع سے فائدہ اٹھانے کی دعوت دیتے ہوئے کہا کہ ایس آئی ایف سی غیر ملکی سرمایہ کاری کے فروغ کے لیے مؤثر ون ونڈو پلیٹ فارم ہے۔ پاکستان ملائیشین کاروباری اداروں کے لیے افغانستان، وسطی ایشیا اور مغربی چین تک رسائی کا دروازہ بن سکتا ہے۔چیئرمین سینیٹ نے کہا کہ پاکستان اور ملائیشیا کے درمیان سیمی کنڈکٹر کے شعبے میں تعاون کے وسیع امکانات موجود ہیں۔

انہوں نے نوجوانوں کو پاکستان کا بہترین اثاثہ قرار دیتے ہوئے کہا کہ ملک کی تقریباً 60 فیصد آبادی نوجوانوں پر مشتمل ہے۔سید یوسف رضا گیلانی نے کہا کہ پاکستان ملائیشیا کی افرادی قوت کی ضروریات پوری کرنے میں اپنا کردار ادا کرنے کے لیے تیار ہے۔ انہوں نے پاک ملائیشیا دفاعی تعاون میں مسلسل پیش رفت کو قابلِ تحسین قرار دیتے ہوئے کہا کہ پاکستان دفاعی پیداوار میں تعاون بڑھانے اور ملائیشیا کی ضروریات کے مطابق دفاعی سازوسامان فراہم کرنے کے لیے تیار ہے۔

ملائیشیا کے وزیر داخلہ نے کہا کہ ملائیشیا پاکستان کے ساتھ دوطرفہ تعلقات اور باہمی تعاون کو مزید مستحکم کرنے کا خواہاں ہے۔ملاقات میں دونوں ممالک کے درمیان پارلیمانی، سیاسی، اقتصادی، تعلیمی اور دفاعی روابط مزید بڑھانے پر اتفاق کیا گیا۔