کے الیکٹرک پر وفاقی حکومت کے واجبات ایک سال میں 93 فیصد بڑھ گئے

جون 2026 تک واجبات 421 ارب روپے تک پہنچ گئے، ایک سال میں 203 ارب روپے کا اضافہ ریکارڈ

پیر 24 اگست 2026 11:10

کراچی (اُردو پوائنٹ اخبارتازہ ترین - این این آئی۔ 24 اگست2026ء) کے الیکٹرک پر وفاقی حکومت کے واجبات میں ایک سال کے دوران 93 فیصد کا نمایاں اضافہ ہوگیا، جس کے بعد جون 2026 تک بجلی کی نجی کمپنی پر وفاقی حکومت کے مجموعی واجبات بڑھ کر 421 ارب روپے تک پہنچ گئے ہیں۔دستیاب اعداد و شمار کے مطابق جون 2025 میں کے الیکٹرک پر وفاقی حکومت کے واجبات 218 ارب روپے تھے، جو ایک سال کے دوران 203 ارب روپے اضافے کے بعد جون 2026 میں 421 ارب روپے ہوگئے۔

ذرائع کے مطابق واجبات میں مسلسل اضافے نے توانائی کے شعبے میں مالی دباؤ مزید بڑھا دیا ہے، جبکہ بجلی کے شعبے کے بڑھتے ہوئے گردشی قرضے بھی حکومت کے لیے بڑا چیلنج بنے ہوئے ہیں۔دوسری جانب پاکستان کے توانائی شعبے کا مجموعی گردشی قرضہ 5 ہزار 286 ارب روپے تک پہنچ گیا ہے۔

(جاری ہے)

اعداد و شمار کے مطابق توانائی کے شعبے کے گردشی قرضے میں گیس کے شعبے کا 3 ہزار 611 ارب روپے جبکہ بجلی کے شعبے کا گردشی قرضہ ایک ہزار 675 ارب روپے شامل ہے۔

عالمی مالیاتی فنڈ (آئی ایم ایف) کی جانب سے بھی پاکستان کے توانائی شعبے کی مالی صورتحال پر تشویش کا اظہار کیا گیا ہے۔ آئی ایم ایف کے مطابق توانائی کا شعبہ مسلسل مالی دباؤ کا شکار ہے، جبکہ گردشی قرضے میں اضافے سے شعبے کی مالی پائیداری متاثر ہورہی ہے۔توانائی شعبے کے بڑھتے ہوئے واجبات اور گردشی قرضے کے باعث حکومت کو بجلی اور گیس کے شعبوں میں مالی نظم و نسق بہتر بنانے، واجبات کی وصولی اور نقصانات پر قابو پانے کے لیے مؤثر اقدامات کی ضرورت ہے۔