Live Updates

خلیجی خطے کی موجودہ صورتحال ایک بار پھر نازک موڑ پر پہنچ گئی ہے، چینی وزیر خا رجہ

پیر 24 اگست 2026 18:34

بیجنگ (اُردو پوائنٹ اخبارتازہ ترین - این این آئی۔ 24 اگست2026ء) چین کے وزیر خارجہ وانگ ای نے بیجنگ میں کویت کے وزیر خارجہ شیخ جراح جابر الاحمد الصباح سے ملاقات کی۔پیر کے روز وانگ ای نے کہا ہے کہ کویت خلیجی عرب ممالک میں عوامی جمہوریہ چین کے ساتھ سفارتی تعلقات قائم کرنے والا پہلا ملک ہے۔ چین نے ہمیشہ چین۔کویت تعلقات کو بہت اہمیت دی ہے اور سفارتی تعلقات کے قیام کی 55ویں سالگرہ کے موقع پر کویت کے ساتھ اعلی معیار کی تزویراتی شراکت داری قائم کرنے کے لیے تیار ہے۔

وانگ ای نے اس بات پر زور دیا کہ مشرق وسطی اور خلیجی خطے کی موجودہ صورتحال ایک بار پھر نازک موڑ پر پہنچ گئی ہے۔ چین کا ہمیشہ سے یہ موقف رہا ہے کہ ایک بار جنگ بندی اور دشمنی کے خاتمے کی جانب پیش رفت شروع ہو جائے تو اس سے پیچھے نہیں ہٹنا چاہیے۔

(جاری ہے)

اس وقت فوری ترجیح کشیدگی میں کمی لانا ہے۔ چین کویت کے ساتھ تعاون مضبوط بنانے اور خطے میں امن و استحکام کی بحالی کے لیے اپنا کردار ادا کرنے کے لیے تیار ہے۔

کویت کے وزیر خارجہ شیخ جراح جابر الاحمد الصباح نے کہا کہ کویت چین کے ساتھ اپنی گہری اور دیرینہ دوستی کو قدر کی نگاہ سے دیکھتا ہے، ایک چین کے اصول پر مضبوطی سے کاربند ہے اور چین کے ساتھ کویت۔چین تزویراتی شراکت داری کو مزید فروغ دینے کے لیے تیار ہے۔ کویتی وزیر خارجہ نے امریکہ، اسرائیل اور ایران کے درمیان تنازع میں چین کے تعمیری کردار کو سراہتے ہوئے کہا کہ کویت خطے میں سلامتی اور استحکام کی جلد بحالی، بین الاقوامی آبی گزرگاہوں کی آزادی اور سلامتی کے تحفظ کے لیے چین کے ساتھ رابطے اور تعاون کو مزید مضبوط بنانے کے لیے تیار ہے۔