اسٹاک مارکیٹ میں اکاؤنٹ کھولنا آسان، ایس ای سی پی کا نیا ڈیجیٹل فریم ورک

جمعہ 28 اگست 2026 20:55

اسلام آباد(اُردو پوائنٹ اخبارتازہ ترین - این این آئی۔ 28 اگست2026ء) سیکیورٹیز اینڈ ایکسچینج کمیشن آف پاکستان نے اسٹاک مارکیٹ میں اکاؤنٹ کھولنے کو تیز اور آسان بنانے کیلئے نیا ڈیجیٹل انویسٹر آن بورڈنگ فریم ورک متعارف کرا دیا ہے،نئے فریم ورک سے دستاویزات اور بار بار کی تصدیق کو ختم کر دیا گیا ہے ،بروکرز کے لیے سرمایہ کاروں کا اکاؤنٹ کھولنے کے لیے واضح ٹائم لائن مقرر کی گئی ہے۔

فریم ورک کے تحت بروکر کو سہل اورسہولت اکاؤنٹ کی درخواست پر ایک دن اور نارمل سرمایہ کار اکاؤنٹ پر دو دن میں فیصلہ کرنا ہوگا۔ سرمایہ کار درخواست کی ٹریکنگ آئی ڈی کے ذریعے درخواست کا اسٹیٹس دیکھ سکیں گے۔ بروکرز کو درخواست مسترد ہونے کی صورت میں وجہ تحریری طور پر بتانا ہوگی۔

(جاری ہے)

اسٹاک مارکیٹ میں نئے سرمایہ کاروں کے اکاوئنٹ کحولنے کو آسان اور تیز بنانا ، اسٹاک مارکیٹ کو وسعت دینے اور سرمایہ کاروں کی تعداد 25 لاکھ تک بڑھانے کی حکمت عملی کا حصہ ہے۔

چیئرمین ایس ای سی پی ڈاکٹر کبیر احمد سدھو نے کہا کہ ٹیکنالوجی کے ذریعے کپیٹل مارکیٹ میں سرمایہ کاری کو آسان اور تیز بنانا اور اس راہ میں حائل رکاوٹیں دور کرنا اولین ترجیح ہے۔ انہون نے کہا کہ پاکستان کی کیپیٹل مارکیٹ میں نوجوانوں کے لیے وسیع مواقع اور ترقی کے امکانات موجود ہیں۔ ایس ای سی پی نے اس سلسلے میں سرکلر جاری کر دی اہے جس میں سیکیورٹیز بروکرز، ایسٹ مینجمنٹ کمپنیوں، انشورنس کمپنیوں اور دیگر ریگولیٹڈ اداروں کے لیے انویسٹر آن بورڈنگ کی شرائط کو یکساں بنایا گیا ہے۔

نئے فریم ورک کے تحت پہلے سے مکمل شدہ مقررہ تصدیق کو دوبارہ کرانے کی ضرورت نہیں ہوگی، جبکہ API پر مبنی ڈیجیٹل پراسیسنگ، UIN کے فوری اجرا اور CDC سب اکاؤنٹ کھولنے کی سہولت بھی فراہم کی گئی ہے۔ اس سے کاغذی کارروائی اور انسانی مداخلت کم ہوگی اور سرمایہ کاروں کے لیے اکاؤنٹ کھولنا مزید آسان ہوگا۔