پٹرولیم مصنوعات کی قیمتوں میں مسلسل اضافہ ناقابل قبول ہے، سکھر چیمبر

منگل 8 ستمبر 2026 23:01

سکھر(اُردو پوائنٹ اخبارتازہ ترین - این این آئی۔ 08 ستمبر2026ء) سکھر چیمبر آف کامرس اینڈ انڈسٹری نے پٹرولیم مصنوعات کی قیمتوں میں مسلسل اضافے پر شدید تشویش کا اظہار کرتے ہوئے حکومت سے فوری ریلیف دینے اور حالیہ اضافہ واپس لینے یا قیمتوں میں خاطر خواہ کمی کا مطالبہ کردیا۔سکھر چیمبر کے مطابق پٹرولیم مصنوعات کی قیمتوں میں مسلسل اضافہ پہلے سے مشکلات کا شکار معیشت، صنعت و تجارت اور عام آدمی کے لیے مزید سنگین مسائل پیدا کر رہا ہے۔

ایندھن کی قیمتوں میں اضافے کے براہ راست اثرات مال برداری، ٹرانسپورٹ، پیداواری لاگت، اشیائے ضروریہ، صنعتی خام مال اور کاروباری اخراجات پر پڑتے ہیں، جس سے صنعتکار، تاجر، ٹرانسپورٹرز اور بالخصوص غریب و متوسط طبقہ متاثر ہوتا ہے۔

(جاری ہے)

چیمبر نے کہا کہ پٹرولیم مصنوعات کی قیمتوں میں اضافے کے اثرات فوری طور پر مارکیٹ میں منتقل ہوجاتے ہیں، تاہم قیمتوں میں کمی کی صورت میں اس کا فائدہ عوام اور کاروباری طبقے تک اسی رفتار سے نہیں پہنچتا، جس کے باعث مہنگائی کا دباؤ مزید بڑھ رہا ہے اور عوام کی قوت خرید مسلسل کم ہورہی ہے۔

سکھر چیمبر آف کامرس اینڈ انڈسٹری نے بجلی کی طویل لوڈشیڈنگ پر بھی تشویش کا اظہار کرتے ہوئے کہا کہ ایک طرف بجلی کی قلت نے صنعت، تجارت اور کاروباری سرگرمیوں کو متاثر کر رکھا ہے جبکہ دوسری جانب پٹرولیم مصنوعات کی قیمتوں میں اضافے سے پیداواری لاگت ناقابل برداشت حد تک بڑھ رہی ہے۔چیمبر کے رہنماؤں نے حکومت پر زور دیا کہ ریونیو بڑھانے کے لیے مسلسل عوام اور کاروباری طبقے پر اضافی بوجھ ڈالنے کے بجائے معاشی سرگرمیوں کے فروغ، صنعتی پیداوار میں اضافے اور کاروباری لاگت میں کمی کو ترجیح دی جائے۔

ان کا کہنا تھا کہ صنعت و تجارت کو مستحکم کیے بغیر پائیدار معاشی ترقی اور روزگار کے نئے مواقع پیدا کرنا ممکن نہیں۔سکھر چیمبر نے حکومت سے مطالبہ کیا کہ پٹرولیم مصنوعات کی قیمتوں میں حالیہ اضافہ واپس لیا جائے یا اس میں خاطر خواہ کمی کی جائے، بجلی کی لوڈشیڈنگ کا مستقل حل نکالا جائے اور صنعت و تجارت کو درپیش بڑھتی ہوئی پیداواری لاگت کم کرنے کے لیے فوری اقدامات کیے جائیں۔ چیمبر نے کاروبار دوست اور متوازن معاشی پالیسیوں کی تشکیل پر بھی زور دیا تاکہ صنعت، تجارت اور سرمایہ کاری کے ساتھ عام آدمی کو بھی حقیقی ریلیف مل سکے۔