برازیل کادوستانہ میچز کے لئے نوجوان کھلاڑیوں پر اعتماد ، کارلو اینچلوٹی نے نئے کھلاڑیوں کو موقع دیدیا

جمعرات 10 ستمبر 2026 11:54

ریو ڈی جنیرو (اُردو پوائنٹ اخبارتازہ ترین - اے پی پی۔ 10 ستمبر2026ء) برازیل کی قومی فٹ بال ٹیم کے مینیجر کارلو اینچلوٹی نے آسٹریلیا اور بھارت کے خلاف طے شدہ دوستانہ میچوں کے لئے اپنے 26 رکنی سکواڈ کا اعلان کر دیا ہے جس میں 8 نئے کھلاڑیوں کو شامل کیا گیا ہے۔ شنہوا کے مطابق پہلی بار قومی سکواڈ کا حصہ بننے والے ان کھلاڑیوں میں کوریتیبا کے گول کیپر پیڈرو موریسکو، کروزیرو کے گول کیپر اوٹاویو، کورنتھینز کے فل بیک میتھیوزنہو اور اتلیٹیکو پرانینس کے ڈیفینڈر آرتھر ڈیاس شامل ہیں۔

اس کے علاوہ ناٹنگھم فارسٹ کے سینٹر بیک جائر کونہا، پی ایس وی کے فل بیک ماؤرو جونیئر، کورنتھینز کے مڈفیلڈر برینو بیڈون اور سانتوس کے مڈفیلڈر گیبریل بونٹیمپو کو بھی پہلی بار برازیلین ٹیم میں طلب کیا گیا ہے۔

(جاری ہے)

صحافیوں سے گفتگو کرتے ہوئے کارلو اینچلوٹی کا کہنا تھا کہ قومی ٹیم کے دروازے ہر کھلاڑی کے لیے کھلے ہیں، تاہم اس وقت ان کی توجہ نئے اور نوجوان کھلاڑیوں کی کارکردگی اور پیشرفت کا جائزہ لینے پر مرکوز ہے۔

امریکہ، میکسیکو اور کینیڈا میں کھیلے گئے فیفا ورلڈ کپ 2026 کے راؤنڈ آف 16 میں ناروے کے ہاتھوں شکست کھا کر باہر ہونے والی ٹیم کے صرف 10 کھلاڑی ہی اس نئے سکواڈ میں اپنی جگہ برقرار رکھ سکے ہیں۔ ورلڈ کپ کے بعد بین الاقوامی فٹ بال سے ریٹائرمنٹ لینے والے نیمار کے علاوہ کیسیمیرو، ایلیسن، ایڈرسن، ڈینیلو اور ویورٹن جیسے سینئر کھلاڑی سکواڈ کا حصہ نہیں ہیں، جبکہ وینسئس جونیئر، رافینہا اور اینڈریک نے ٹیم میں اپنی جگہ برقرار رکھی ہے۔ اینچلوٹی نے اعتراف کیا کہ ورلڈ کپ کا نتائج ان کے اور پوری ٹیم کے لیے انتہائی دردناک تھے، جس کا انہیں افسوس ہے۔ برازیل کی ٹیم 25 اور 29 ستمبر کو ٹاؤنزویل اور برسبین میں آسٹریلیا کے خلاف جبکہ اس کے چار دن بعد بھارت کے خلاف میچز کھیلے گی۔