اپنے پُرامن اور آئینی حقِ احتجاج سے دستبردار نہیں ہوں گے، سہیل آفریدی

تشدد یا قانون شکنی کے حامی نہیں، ہمارا مطالبہ صرف یہ ہے کہ عدالتیں اور متعلقہ ادارے آئین و قانون کے مطابق غیر جانب دارانہ اور منصفانہ فیصلہ کریں؛ وزیراعلیٰ خیبرپختونخواہ کا بیان

ساجد علی پیر 14 ستمبر 2026 15:52

اپنے پُرامن اور آئینی حقِ احتجاج سے دستبردار نہیں ہوں گے، سہیل آفریدی

لاہور (اُردو پوائنٹ اخبارتازہ ترین۔ 14 ستمبر 2026ء) وزیراعلیٰ خیبرپختونخواہ سہیل آفریدی کا کہنا ہے کہ پاکستان کا آئین محض ایک کاغذ کا ٹکڑا نہیں ہے، بلکہ یہ ملک کو جوڑنے، قومی یکجہتی، قانون کی حکمرانی اور تمام شہریوں کے مساوی آئینی حقوق کا سب سے بڑا ضامن ہے۔ سوشل میڈیا پلیٹ فارم ایکس پر سہیل آفریدی نے اپنے بیان میں ریاست کے انتظامی ڈھانچے اور آئینی نفاذ پر زور دیتے ہوئے کہا کہ اگر آئین پاکستان پر اس کی اصل روح اور اصولوں کے مطابق عمل درآمد کیا جائے تو یہ پوری ریاست اور تمام شہریوں کے لیے یکساں طور پر انتہائی فائدے کا باعث بنے گا۔

انہوں نے اپنی جماعت کی جدوجہد کو خالصتاً نظریاتی قرار دیتے ہوئے کہا کہ عمران خان کے حقیقی آزادی کے نقطہ نظر کے مطابق ہماری موجودہ تمام تر سیاسی و قانونی جدوجہد کسی ذاتی عہدے، اقتدار یا کرسی کے لیے ہرگز نہیں ہے بلکہ ہمارا بنیادی مقصد ملک میں صرف اور صرف آئین کی بالادستی، قانون کی حکمرانی اور عام آدمی کو انصاف کا حصول ممکن بنانا ہے۔

(جاری ہے)

آئینِ پاکستان کو محض کاغذ کا ٹکڑا نہیں، بلکہ ایک مضبوط ریاست، قومی یکجہتی، انصاف، قانون کی حکمرانی اور تمام شہریوں کے مساوی حقوق کی ضمانت سمجھا جانا چاہیے۔ اگر آئین پر اس کی روح کے مطابق عمل کیا جائے تو یہ ملک اور تمام شہریوں کے مفاد میں ہوگا۔

جہاں تک لانگ مارچ اور پُرامن احتجاج…
— Sohail Afridi (@SohailAfridiISF) September 14, 2026

پاکستان تحریک انصاف کے ممکنہ 27 ستمبر کے لانگ مارچ اور پنجاب اسٹریٹ موومنٹ سے متعلق گفتگو کرتے ہوئے وزیراعلیٰ خیبرپختونخواہ نے آئینی احتجاج کو جمہوری حق قرار دیا، سہیل آفریدی کا کہنا تھا کہ ملک کا آئین اور قانون تمام شہریوں کو اپنے جائز مطالبات کے حق میں آواز اٹھانے اور احتجاج کرنے کا جمہوری حق فراہم کرتا ہے، ہماری تحریک کسی بھی قسم کی قانون شکنی، گھیراؤ جلاؤ یا تشدد کی ہرگز حامی نہیں ہے۔

انہوں نے ریاستی اداروں، انتظامیہ اور عدالتوں کو مخاطب کرتے ہوئے مطالبہ کیا کہ وہ اپنے قانونی دائرہ کار میں رہتے ہوئے غیر جانبدارانہ اور منصفانہ فیصلے صادر کریں، جب تک ہمارے تمام تر جائز، سیاسی اور آئینی مطالبات کو تسلیم نہیں کیا جاتا اور قانون کے مطابق انصاف کی فراہمی ممکن نہیں ہوتی، ہم اپنے اس آئینی اور جمہوری حقِ احتجاج سے کسی صورت دستبردار نہیں ہوں گے۔