پی ٹی آئی رہنما اعجاز ستی مبینہ پولیس حراست میں پراسرار طور پر جاں بحق

راولپنڈی میں تحریک انصاف کے بزرگ رہنماء اعجاز ستی کو پولیس نے گھر سے اٹھایا، آدھے گھنٹے بعد ورثاء کو ہسپتال بلایا گیا جہاں اعجاز ستی کی نعش پڑی تھی؛ صحافی محمد عمیر کی ایکس پوسٹ

ساجد علی جمعرات 17 ستمبر 2026 12:29

پی ٹی آئی رہنما اعجاز ستی مبینہ پولیس حراست میں پراسرار طور پر جاں بحق

راولپنڈی (اُردو پوائنٹ اخبارتازہ ترین۔ 17 ستمبر 2026ء) راولپنڈی سے پاکستان تحریک انصاف (پی ٹی آئی) کے سینئر اور بزرگ رہنما اعجاز ستی مبینہ پولیس حراست کے دوران پراسرار طور پر جاں بحق ہوگئے۔ سماجی رابطے کی ویب سائٹ ایکس پر صحافی محمد عمیر کی جانب سے شیئر کی گئی اطلاع کے مطابق راولپنڈی پولیس نے پی ٹی آئی کے بزرگ رہنماء اعجاز ستی کو دن تین بجے ان کی رہائش گاہ سے حراست میں لیا تھا، تاہم گرفتاری کے بمشکل آدھے گھنٹے بعد ہی پولیس کی جانب سے ان کے ورثاء کو اچانک ہسپتال پہنچنے کی اطلاع دی گئی۔

راولپنڈی
تحریک انصاف کے بزرگ رہنما اعجاز ستی کو دن تین بچے پولیس نے گھر سے اٹھایا،آدھے گھنٹے بعد ورثاء کو ہسپتال بلایا گیا جہاں اعجاز ستی کی نعش پڑی تھی۔ pic.twitter.com/vMGPOmw6Q9
— Muhammad Umair (@MohUmair87) September 16, 2026

بتایا گیا ہے کہ ورثاء جب پریشانی کی عالم میں ہسپتال پہنچے تو وہاں اعجاز ستی کی میت موجود تھی، جس سے ظاہر ہوتا ہے کہ وہ حراست میں ہی دم توڑ چکے تھے، اہل خانہ نے الزام عائد کیا ہے کہ بزرگ رہنماء کو حراست کے دوران تشدد یا ذہنی و جسمانی صدمے کا نشانہ بنایا گیا جس کے باعث ان کی فوری موت واقع ہوئی، اہل خانہ اور پی ٹی آئی رہنماؤں نے واقعے کی فوری اعلیٰ سطح پر جوڈیشل انکوائری کا مطالبہ کیا ہے۔

(جاری ہے)

ریاست کی ایک اور درندگی - 27 ستمبر کے لانگ مارچ سے خوفزدہ حکومتی مشینری کے سیاسی انتقام کا کھلا مظاہرہ۔

پاکستان تحریک انصاف کے سینئر رہنما اعجاز ستی صاحب کو دن 3 بجے ان کے گھر سے بالکل تندرست اور فعال حالت میں اٹھایا گیا، اور محض آدھے گھنٹے بعد ان کی لاش اسپتال پہنچا دی گئی۔… pic.twitter.com/UvTYAC1lvr
— PTI (@PTIofficial) September 16, 2026

پاکستان تحریک انصاف کا اس واقعے پر کہنا ہے کہ ریاست کی جانب سے ایک اور درندگی کا مظاہرہ کیا گیا اور یہ واقعہ 27 ستمبر کے لانگ مارچ سے خوفزدہ حکومتی مشینری کے سیاسی انتقام کا کھلا مظاہرہ ہے، جہاں پاکستان تحریک انصاف کے سینئر رہنما اعجاز ستی صاحب کو ان کے گھر سے بالکل تندرست اور فعال حالت میں اٹھایا گیا اور محض آدھے گھنٹے بعد ان کی لاش ہسپتال پہنچا دی گئی، 27 ستمبر کا لانگ مارچ روکنے کیلئے پرامن سیاسی ورکرز پر یہ مظالم ہرگز برداشت نہیں کیے جائیں گے۔

پارٹی ترجمان کا کہنا ہے کہ سوشل میدیا پر موجودہ ویڈیو میں ان کے صاحبزادے کو ہسپتال کے عملے اور انتظامیہ سے سی سی ٹی وی فوٹیج کا مطالبہ کرتے ہوئے دیکھا جا سکتا ہے تاکہ اس حراستی قتل کا اصل سچ اور حقائق سامنے آ سکیں، ایک بھلے چنگے انسان کا پولیس حراست کے چند منٹوں کے اندر یوں دم توڑ جانا قدرتی موت ہرگز نہیں بلکہ بدترین تشدد اور فاشزم کا نتیجہ ہے، اعجاز ستی کی اس حراستی موت کی فوری شفاف تحقیقات کی جائیں اور ذمہ داران کا محاسبہ کیا جائے۔