Live Updates

لیفٹیننٹ جنرل ریٹائرڈ نعمان محمود مکہ دفاعی معاہدے کے تحت پہلے سیکرٹری جنرل مقرر

سیکرٹری جنرل ریاض میں قائم کیے جانے والے اتحاد کے جنرل سیکرٹریٹ کی قیادت کریں گے.وزارت خارجہ

میاں محمد ندیم بدھ 23 ستمبر 2026 17:58

لیفٹیننٹ جنرل ریٹائرڈ نعمان محمود مکہ دفاعی معاہدے کے تحت پہلے سیکرٹری ..

اسلام آباد(اردوپوا ئنٹ اخبارتازہ ترین-انٹرنیشنل پریس ایجنسی۔23 ستمبر ۔2026 ) لیفٹیننٹ جنرل ریٹائرڈ نعمان محمود مکہ دفاعی معاہدے کے تحت پہلے سیکرٹری جنرل مقرر کردیے گئے وزارت خارجہ کا کہنا ہے کہ سیکرٹری جنرل ریاض میں قائم کیے جانے والے اتحاد کے جنرل سیکرٹریٹ کی قیادت کریں گے. یاد رہے کہ ترک وزیرخارجہ ہاقان فیدان نے گز شتہ ماہ تصدیق کی تھی کہ ترکیہ، پاکستان اور سعودی عرب کے درمیان مکہ دفاعی معاہدے کا سیکرٹری جنرل پاکستان سے ہوگایاد رہے کہ ترکیہ کے صدر رجب طیب اردوان، سعودی عرب کے ولی عہد محمد بن سلمان اور پاکستان کے وزیراعظم محمد شہباز شریف نے 7 اگست کو مکہ مکرمہ میں مکہ مشترکہ دفاعی معاہدے پر دستخط کیے تھے.

(جاری ہے)

ترکیہ، پاکستان اور سعودی عرب نے خطے اور عالمی سطح پر بڑھتی ہوئی عدم استحکام کی صورتحال کے پیش نظر مشترکہ ذمہ داری اور علاقائی ملکیت کے تصور کے تحت یہ معاہدہ کیا معاہدے کا بنیادی مقصد علاقائی اور عالمی سطح پر سلامتی، امن، استحکام اور خوش حالی کو فروغ دینا اور تینوں ممالک کی مشترکہ دفاعی بازدار صلاحیت کو مضبوط بنانا ہے. معاہدے کی سب سے اہم شقوں میں سے ایک کے مطابق فریقین میں سے کسی ایک ملک پر ہونے والا حملہ تمام فریقین پر حملہ تصور کیا جائے گا معاہدے میں خطے میں تعاون کی ایک نئی ثقافت کو فروغ دینے پر بھی زور دیا گیا ہے اس کے تحت بین الاقوامی قوانین کا احترام کرنے اور پرامن تعاون کے مشترکہ وڑن پر یقین رکھنے والے دیگر ممالک اور متعلقہ فریقوں کے لیے بھی اتحاد میں شمولیت کی گنجائش رکھی گئی ہے.

استنبول میں اسٹریٹجک سیاسی و دفاعی کمیٹی کا پہلا اجلاس اس معاہدے کو عملی شکل دینے کی جانب ایک اہم پیش رفت ہے، کیونکہ اس کے ذریعے تینوں ممالک نے مشترکہ دفاعی تعاون کو محض ایک سیاسی اعلان کے بجائے مستقل ادارہ جاتی اور عملی ڈھانچے میں تبدیل کرنے کا عمل شروع کردیا ہے.