سندھ ہائی کورٹ : یلو لائن کرپشن کیس، چیئرمین اینٹی کرپشن کو شوکاز نوٹس

جمعہ 25 ستمبر 2026 19:15

کراچی (اُردو پوائنٹ اخبارتازہ ترین - این این آئی۔ 25 ستمبر2026ء) سندھ ہائیکورٹ نے کراچی موبیلٹی پروجیکٹ (یلو لائن) میں مبینہ کرپشن کی تحقیقات میں تاخیر سے متعلق درخواست کی سماعت کے دوران چیئرمین اینٹی کرپشن کو شوکاز نوٹس جاری کردیا۔عدالت نے ریمارکس دیے کہ ایف آئی آر درج ہونے کے باوجود ضابطہ فوجداری کی دفعہ 173 کے تحت رپورٹ جمع نہیں کرائی گئی، تحقیقات میں غیر ضروری تاخیر اور رپورٹ پیش نہ کرنے کی کوئی وضاحت بھی سامنے نہیں آئی۔

(جاری ہے)

عدالت نے قرار دیا کہ بظاہر یہ تاخیر سنگین غفلت کو ظاہر کرتی ہے اور سوال پیدا ہوتا ہے کہ کہیں تحقیقات میں جان بوجھ کر تاخیر تو نہیں کی جارہی۔عدالت نے چیئرمین اینٹی کرپشن سے وضاحت طلب کی کہ معاملہ مزید تحقیقات کیلئے نیب کو کیوں نہ بھیجا جائے اور مبینہ غفلت پر ان کے خلاف محکمانہ کارروائی کیوں نہ کی جائے۔عدالت کو بتایا گیا کہ مقدمہ کراچی کے اہم سرکاری انفرااسٹرکچر منصوبے کراچی موبیلٹی پروجیکٹ (یلو لائن) سے متعلق ہے، جس میں عالمی بینک کے تعاون سے نئے جام صادق پل، داؤد چورنگی کے قریب ڈپو ون اور انڈس اسپتال کے نزدیک ڈپو ٹو کی تعمیر کے معاہدے بھی شامل ہیں۔عدالت نے کیس کی مزید سماعت 7 اکتوبر تک ملتوی کردی۔