رضوان کا این سی سی آئی اے کو دوسرا خط، موبائل فون واپسی اور انکوائری کی تفصیلات کا مطالبہ

منگل 29 ستمبر 2026 20:09

لاہور(اُردو پوائنٹ اخبارتازہ ترین - این این آئی۔ 29 ستمبر2026ء) قومی کرکٹ ٹیم کے وکٹ کیپر بیٹر محمد رضوان نے نیشنل سائبر کرائم انویسٹی گیشن ایجنسی (این سی سی آئی ای)کو دوسرا خط ارسال کردیا ۔خط میں انہوں نے انکوائری سے متعلق اب تک تحریری طور پر آگاہ نہ کیے جانے اور اپنے موبائل فون کی واپسی میں تاخیر پر وضاحت طلب کی ہے۔محمد رضوان نے خط میں لکھا ہے کہ انکوائری سے متعلق مجھے تاحال تحریری طور پر کچھ فراہم نہیں کیا گیا جبکہ این سی سی آئی اے نے مزید کارروائی کے حوالے سے مجھ سے رابطہ نہیں کیا، 31اگست کو جب انگلینڈ میں مجھ سے موبائل فون لیا گیا تو میں نے پاسورڈ فراہم کیا اور میری موجودگی میں میرے موبائل کا معائنہ کیاگیا۔

خط میں لکھا گیا ہے کہ 31اگست کو مجھ سے موبائل تین گھنٹے کے اندر واپس کرنے کی یقین دہانی پر لیا گیا تھا اور مجھے بتایا گیا تھا کہ میرے فون کا ڈیجیٹل فرانزک جلد مکمل ہو جائے گا۔

(جاری ہے)

خط میں کہا گیا ہے کہ 10 ستمبر کو این سی سی آئی اے میں پیشی کے موقع پر حکام کو میرے ان لاک موبائل فون تک رسائی حاصل تھی اور میری موجودگی میں این سی سی آئی اے حکام نے میرے موبائل فون کے پیغامات اور دیگر مواد کا جائزہ لیا۔

محمد رضوان کے خط میں لکھا گیا ہے کہ میں نے کسی بھی مرحلے پر موبائل پاسورڈ فراہم کرنے سے انکار نہیں کیا، مجھے بتایا جائے کہ این سی سی آئی اے میں میری حاضری کس تاریخ اور وقت پر درکار ہی ۔ خط میں درخواست کی گئی ہے کہ انکوائری کی وجوہات سے مجھے تحریری طور پر آگاہ کیا جائے، میں نے ہمیشہ این سی سی آئی اے کے ساتھ تمام مطلوبہ معلومات کے حوالے سے تعاون کیا ہے۔محمد رضوان نے خط میں لکھا ہے کہ میرا فون آپ کے پاس ہے، بغیر تاخیر کے میرا فون مجھے واپس کیا جائے اور مجھ سے رابطے کے لیے سرکاری طریقہ کار اختیار کیا جائے اور رابطہ میرے گھر کے پتے پر کیا جائے۔