درآمدی پرانی گاڑیوں کی جانچ، وفاقی کابینہ کے اجلاس کی تفصیلات طلب

62 اقوام متحدہ ضوابط کے تحت حفاظتی و ماحولیاتی معیار کی جانچ یقینی بنانے کی درخواست، حکومت نے کابینہ اجلاس کا حوالہ دے دیا

بدھ 30 ستمبر 2026 17:20

کراچی(اُردو پوائنٹ اخبارتازہ ترین - این این آئی۔ 30 ستمبر2026ء) سندھ ہائیکورٹ کے آئینی بینچ کے روبرو پرانی گاڑیوں کی درآمد کے دوران اقوام متحدہ کے ضابطوں پر عمل درآمد نہ کرنے سے متعلق درخواست کی سماعت ہوئی۔درخواست گزار کے وکیل نے مؤقف اختیار کیا کہ استعمال شدہ گاڑیوں کی درآمد کو مقررہ حفاظتی، ماحولیاتی اور معیار کے تقاضوں کی تکمیل سے مشروط کیا گیا ہے۔

انجینئرنگ ڈیولپمنٹ بورڈ نے 2025ئ میں 62 اقوام متحدہ کے ضوابط کے تحت گاڑیوں کی جانچ کا دو مرحلہ نظام مقرر کرنے کا نوٹیفکیشن جاری کیا تھا، جس میں درآمد سے قبل معائنہ اور درآمد کے بعد آزاد تھرڈ پارٹی معائنہ شامل تھا۔وکیل نے کہا کہ عملی طور پر رجسٹرڈ معائنہ ایجنسیاں صرف عمومی تقاضے چیک کررہی ہیں اور 62 اقوام متحدہ کے ضوابط کے مطابق گاڑی کی موجودہ حالت کی تصدیق نہیں کی جارہی۔

(جاری ہے)

دستاویزات میں بھی استعمال شدہ گاڑیوں کی درآمد کے وقت موجودہ حالت میں حفاظتی معیار سے مطابقت ثابت نہیں ہوتی۔درخواست گزار نے عدالت سے استدعا کی کہ درآمد سے قبل معائنہ گاڑی کی موجودہ حالت کی بنیاد پر کیا جائے جبکہ کسٹمز سے کلیئرنس سے قبل ہر استعمال شدہ درآمدی گاڑی کا لازمی بعد از درآمد معائنہ بھی کرایا جائے۔وفاقی حکومت کے وکیل نے بتایا کہ اس معاملے پر وفاقی کابینہ کا اجلاس ہوچکا ہے۔ عدالت نے وفاقی کابینہ کے اجلاس کی تفصیلات طلب کرتے ہوئے سماعت 4 ہفتوں کیلئے ملتوی کردی۔درخواست میں وفاقی وزارت صنعت، وزارت تجارت، ایف بی آر، انجینئرنگ ڈیولپمنٹ بورڈ اور دیگر کو فریق بنایا گیا ہے۔