ٹنڈوآدم میں پی سی بی ٹیلنٹ ہنٹ پروگرام، جامعہ ملیہ سکول نے چک سانگھڑ کو دو وکٹوں سے شکست دے دی

حیدرآباد (اُردو پوائنٹ اخبارتازہ ترین - اے پی پی۔ 01 اکتوبر2026ء) پاکستان کرکٹ بورڈ (پی سی بی) کے ٹیلنٹ ہنٹ پروگرام کے تحت ٹنڈوآدم کرکٹ گراؤنڈ میں جامعہ ملیہ سکول اور چک سانگھڑ سکول کی ٹیموں کے درمیان میچ کھیلا گیا جس میں جامعہ ملیہ سکول نے چک سانگھڑ کو دو وکٹوں سے شکست دے دی۔ چک سانگھڑ سکول نے پہلے بیٹنگ کرتے ہوئے 176 رنز بنائے۔ جواب میں جامعہ ملیہ سکول کی ٹیم نے مطلوبہ ہدف 8 وکٹوں کے نقصان پر حاصل کرکے کامیابی اپنے نام کرلی۔

میچ کے دوران دونوں ٹیموں کے کھلاڑیوں نے عمدہ کھیل کا مظاہرہ کیا اور مقابلہ آخری مرحلے تک دلچسپ رہا۔ جامعہ ملیہ سکول کی کامیابی میں فاروق پٹھان نے نمایاں کردار ادا کرتے ہوئے 32 رنز بنانے کے علاوہ 4 وکٹیں حاصل کیں، جس پر انہیں میچ کا بہترین کھلاڑی قرار دیا گیا۔

(جاری ہے)

اس موقع پر پاکستان کرکٹ بورڈ کے ضلع سانگھڑ کے ہیڈ کوچ منصور بیگ نے کہا کہ ٹیلنٹ ہنٹ پروگرام کا مقصد سکول سطح پر موجود باصلاحیت نوجوان کرکٹرز کو تلاش کرکے انہیں آگے بڑھنے کے مواقع فراہم کرنا ہے۔

انہوں نے کہا کہ ٹنڈوآدم میں ہونے والے میچ میں متعدد باصلاحیت کھلاڑی سامنے آئے ہیں، جن کی تکنیک، فٹنس، نظم و ضبط اور کھیل کی مہارت کو مزید نکھارنے پر کام کیا جائے گا۔ انہوں نے کہا کہ ضلع سانگھڑ میں کرکٹ کا بے پناہ ٹیلنٹ موجود ہے، تاہم ماضی میں مناسب سہولیات اور گراؤنڈز کی کمی کے باعث بہت سے نوجوان اپنی صلاحیتوں کا بھرپور اظہار نہیں کر سکے۔

پی سی بی کے ٹیلنٹ ہنٹ پروگرام کے ذریعے ایسے کھلاڑیوں کو اپنی صلاحیتیں دکھانے کا موقع مل رہا ہے اور امید ہے کہ مستقبل میں ضلع سانگھڑ سے قومی سطح کے کھلاڑی سامنے آئیں گے۔ ٹنڈوآدم کرکٹ گراؤنڈ کے نگران مختیار علی عمرانی نے کہا کہ پی سی بی کی جانب سے ٹیلنٹ ہنٹ پروگرام کے لیے ٹنڈوآدم کرکٹ گراؤنڈ کو مرکز بنانا خوش آئند ہے۔ انہوں نے کہا کہ گراؤنڈ میں بہتر سہولیات کی فراہمی سے نوجوانوں کو کرکٹ کی طرف راغب کرنے میں مدد مل رہی ہے اور ایسے مقابلوں سے مقامی کھلاڑیوں کو اپنی صلاحیتیں منوانے کے مواقع حاصل ہوں گے۔

دی سٹی سکولز کے چیئرمین مرزا اشفاق بیگ نے کہا کہ پی سی بی کا ٹیلنٹ ہنٹ پروگرام سکولوں میں موجود نئے کرکٹ ٹیلنٹ کو تلاش کرنے اور اسے قومی سطح تک پہنچانے کی جانب اہم قدم ہے۔ انہوں نے کہا کہ سرکاری و نجی اسکولوں کے نوجوان کھلاڑیوں کو ایسے مقابلوں میں زیادہ سے زیادہ مواقع فراہم کیے جانے چاہئیں۔ اس موقع پر کرکٹر عبدالرحمٰن خاصخیلی نے بھی پی سی بی کے ٹیلنٹ ہنٹ پروگرام کو سراہتے ہوئے کہا کہ سکول سطح پر کرکٹ کے فروغ اور نئے کھلاڑیوں کی تلاش کے لیے ایسے پروگراموں کا تسلسل ضروری ہے۔

انہوں نے کہا کہ ضلع سانگھڑ کے مختلف علاقوں سے مزید ٹیموں اور کلبوں کو مواقع فراہم کیے جائیں تاکہ زیادہ سے زیادہ باصلاحیت کھلاڑی سامنے آسکیں۔ انہوں نے اس امر پر بھی زور دیا کہ کرکٹ کے فروغ کے لیے شفاف اور میرٹ پر مبنی نظام کو یقینی بنایا جائے تاکہ کسی بھی علاقے یا پس منظر سے تعلق رکھنے والا باصلاحیت کھلاڑی اپنی صلاحیتوں کی بنیاد پر آگے بڑھ سکے۔