این او سی نہ ملنے پر پاکستان چیمپئنز ورلڈ چیمپئن شپ آف لیجنڈز سے دستبردار

منگل 6 اکتوبر 2026 00:22

لاہور (اُردو پوائنٹ اخبارتازہ ترین - اے پی پی۔ 06 اکتوبر2026ء) پاکستان کرکٹ بورڈ کی جانب سے نو آبجیکشن سرٹیفکیٹ (این او سی) جاری نہ کیے جانے کے باعث پاکستان چیمپئنزنے ورلڈ چیمپئن شپ آف لیجنڈز (ڈبلیو سی ایل) میں شرکت سے دستبرداری اختیار کرلی ہے۔ پاکستان چیمپئنز کی انتظامیہ نے اپنے بیان میں کہا ہے کہ ٹیم کی جانب سے پی سی بی کے فیصلے پر نظرثانی کی درخواست کی گئی تھی اور اس معاملے پر بورڈ کے ساتھ مسلسل رابطہ بھی برقرار رہا تاہم فریقین کے درمیان اختلاف ختم نہ ہوسکا۔

ٹیم نے پی سی بی کے فیصلے کا احترام کرتے ہوئے کہا کہ کھلاڑیوں کو عالمی سطح پر لیجنڈز کی اس کرکٹ لیگ میں پاکستان چیمپئنز کی نمائندگی نہ کر پانے پر افسوس ہے۔ ڈبلیو سی ایل کا رواں ایڈیشن 3 اکتوبر سے شروع ہوا تاہم پاکستان اور بنگلہ دیش کے درمیان شیڈول میچ کو ملتوی کردیا گیا تھا۔

(جاری ہے)

منتظمین کی جانب سے پاکستان کے میچز دوبارہ ترتیب دینے اور این او سی کے معاملے کو حل کرنے کی کوشش کی گئی لیکن کوئی حتمی پیش رفت نہ ہونے کے باعث پاکستان کی ٹیم کو ایونٹ سے الگ ہونا پڑا۔

پاکستان چیمپئنز کی قیادت شاہد آفریدی کے پاس تھی جبکہ اسکواڈ میں شعیب ملک، محمد حفیظ، سرفراز احمد اور وہاب ریاض سمیت کئی سابق پاکستانی اسٹارز شامل تھے۔ پاکستان کی ٹیم گزشتہ سال ڈبلیو سی ایل میں فائنل تک پہنچی تھی، جہاں اسے جنوبی افریقہ کے ہاتھوں شکست کا سامنا کرنا پڑا تھا۔ پاکستان کرکٹ بورڈ اور ڈبلیو سی ایل کے درمیان تنازع گزشتہ ایڈیشن کے دوران اس وقت شدت اختیار کرگیا تھا جب بھارت نے پاکستان کے خلاف دو میچز میں شرکت نہیں کی۔

پی سی بی نے اس صورتحال پر سخت ردعمل دیتے ہوئے ٹورنامنٹ پر جانبداری اور کھیل میں سیاست کو شامل کرنے کے الزامات عائد کیے تھے۔ بورڈ نے بعد ازاں ڈبلیو سی ایل میں پاکستان کی مستقبل میں شرکت پر پابندی کا مؤقف اختیار کیا تھا، جس پر اس سال بھی عملدرآمد برقرار رکھا گیا۔ این او سی نہ ملنے کے بعد پاکستان چیمپئنز کی انتظامیہ کی آخری کوششیں بھی کامیاب نہ ہوسکیں اور بالآخر ٹیم نے رواں ایونٹ سے دستبرداری کی تصدیق کردی۔