بھارت کینیڈا کے داخلی معاملات میں ملوث قرار، انٹیلی جنس رپورٹ میں انکشاف

منگل 6 اکتوبر 2026 11:48

ٹورنٹو (اُردو پوائنٹ اخبارتازہ ترین - اے پی پی۔ 06 اکتوبر2026ء) کینیڈین سکیو رٹی انٹیلیجنس کی رپورٹ کے مطابق بھارت کے کینیڈا کے داخلی معاملات میں مداخلت کے شواہد ملے ہیں۔کشمیرمیڈیاسروس کے مطابق کینیڈین سکیورٹی انٹیلیجنس کی رپورٹ میں انکشاف کیاگیاہے کہ بھارت کینیڈا کے داخلی معاملات میں ملوث ہے اور وہ کینیڈا کی کمیونٹیز اور جمہوری عمل میں مداخلت کر رہا ہے۔

غیر ملکی میڈیا کے مطابق خفیہ ادارے کی رپورٹ میں کہا گیا ہے کہ بھارت آئندہ سال ہونے والے انتخابات میں مداخلت کی کوششیں کر رہا ہے۔ بھارتی حکام، سفارت کار اور انٹیلی جنس سروسز کے اہلکار مداخلت کر رہے ہیں۔ بھارتی سفارت کاروں کی بے دخلی کے بعد اب پراکسی ایجنٹس اور تنظیمیں فعال ہیں۔ نئی دہلی بھارتی نژاد کینیڈین میڈیا اور سوشل میڈیا کو بھی استعمال کر رہا ہے۔

(جاری ہے)

سکھ فار جسٹس کے رہنما گرپتونت سنگھ پنوں نے میڈیا سے گفتگو میں کہا ہے کہ کینیڈین سیکیورٹی انٹیلی جنس کے پاس بھارتی مداخلت کے شواہد موجود ہیں۔ رکن لبرل پارٹی دانیال ابراہیم کا کہنا ہے کہ کینیڈا اور بھارت کے تعلقات اب پہلے جیسے نہیں رہے ہیں۔کینیڈین وزیراعظم مارک کارنی نے گزشتہ ہفتے نیویارک ٹائمز کو انٹرویو دیتے ہوئے کہا تھا کہ ہردیپ سنگھ نجر کے قتل میں بھارت ملوث تھا، جس کے شواہد موجود ہیں۔