میسی ڈونیا کی پارلیمنٹ پرمشتعل افراد کا حملہ، متعدد ارکان زخمی

تقریبا 200 کے قریب نقاب پہنے مظاہرین پارلیمنٹ کے اندر تخربب کاری کے ارادے سے داخل ہوئے ،ْعینی شاہدین

جمعہ 28 اپریل 2017 23:27

اسکوپ جی(اُردو پوائنٹ اخبار آن لائن۔ ہفتہ 29 اپریل 2017ء)یورپی ملک میسی ڈونیا کی پارلیمنٹ پر مشتعل افراد نے حملہ کردیا جس کے نتیجے میں متعدد ارکان شدید زخمی ہوگئے۔غیر ملکی میڈیا کے مطابق جنوب مشرقی یورپی ملک میسی ڈونیا میں اسپیکر کی تقرری کے معاملے پرمشتعل ہجوم پولیس کا حصار توڑ کر پارلیمنٹ میں داخل ہوگیا جس کے بعد ہجوم نے ارکان پارلیمنٹ پر بدترین تشدد کیا جس کے نتیجے میں کئی ارکان لہو لہان ہوگئے جس میں خواتین بھی شامل ہیں ،ْمشتعل ہجوم نے اپوزیشن لیڈر زورن زیو کو گھیرے میں لیتے ہوئے غدار کے نعرے لگائے اور ان پر مکوں کی بارش کردی جس کے نتیجے میں وہ بھی شدید زخمی ہوگئے تاہم اہلکار انہیں عمارت سے باہر نکالنے میں کامیاب ہوگئے۔

اپوزیشن جماعت سوشل ڈیموکریٹ نے اسپیکر کی تقرری کے لئے طلعت شیفری کے حق میں ووٹ دیا تھا جس پر سابق حکمراں جماعت ومرو ڈمنی کے ارکان مشتعل ہوگئے اور انہوں نے اپوزیشن کے اقدام کو غداری قرار دیا جبکہ اپوزیشن لیڈر زورن زیو نے مشتعل ہجوم کے ہاتھوں زخمی ہونے کے باوجود پارلیمنٹ کے باہر میڈیا سے بات کرتے ہوئے کہا کہ ان کی جماعت اور اتحادیوں نے اسپیکر کے لئے اتفاق رائے سے طلعت شیفری کا انتخاب کیا ہے اور وہی اگلے اسپیکر ہوں گے۔

(جاری ہے)

عینی شاہدین کے مطابق تقریبا 200 کے قریب نقاب پہنے مظاہرین پارلیمنٹ کے اندر تخربب کاری کے ارادے سے داخل ہوئے جب کہ ایک بڑا ہجوم پارلیمنٹ کے باہر رہا، نقاب پہنے مظاہرین نے عمارت کے اندر داخل ہوتے ہی نعرے لگائے اور پھر فرنیچر توڑتے ہوئے ارکان پارلیمنٹ پر حملہ کیا۔