سائنس دانوں نے خون کے ٹیسٹ سے سرطان کی تشخیص کرنے کا اہم سنگِ میل حاصل کر لیا

جمعہ 19 جنوری 2018 21:07

لندن۔ (اُردو پوائنٹ اخبار آن لائن۔ جمعہ 19 جنوری 2018ء)سائنس دانوں نے خون کے ٹیسٹ کے ذریعے سرطان کی تشخیص کرکے طب کی دنیا میں ایک اہم سنگِ میل حاصل کر لیا ہے۔برطانوی نشریاتی ادارہ کے مطابق امریکہ کی جانز ہاپکنز یونیورسٹی کے سائنس دانوں کی ایک ٹیم نے ایک ایسے طریق کار کا تجربہ کیا ہے جس کے تحت آٹھ قسم کے سرطانوں کی تشخیص خون کے ذریعے کی جا سکتی ہے۔

اس کا مقصد سرطان کی بروقت تشخیص اور علاج ہے اور اس سے بہت سی زندگیاں بچائی جا سکیں گی۔برطانوی ماہرین کا کہنا ہے کہ یہ پیش رفت 'انتہائی پرجوش ہے۔تاہم ایک ماہر نے کہا ہے کہ سرطان کو ابتدائی مراحل میں پکڑنے کے لیے اس ٹیسٹ کا موثر پن جاننے کے لیے مزید تجربات کی ضرورت ہے۔سرطانی رسولیوں سے بہت قلیل مقدار میں تقلیب شدہ ڈی این اے اور پروٹینز خارج ہوتی ہیں جو خون میں شامل ہو جاتی ہیں۔

(جاری ہے)

’’کینسر سِیک‘‘ نامی یہ ٹیسٹ 16 جینز کے اندر ایسی تبدیلیوں کا پتہ چلا سکتا ہے جو عام طور پر سرطان کے نتیجے میں رونما ہوتی ہیں۔ اس کے علاوہ یہ آٹھ قسم کی سرطانی پروٹینز کا بھی پتہ چلا سکتا ہے۔اس کا تجربہ 1005 مریضوں پر کیا گیا جنھیں بیضہ دانی، جگر، معدے، لبلبے، خوراک کی نالی، بڑی آنت یا چھاتی کا سرطان تھا اور جو ابھی دوسرے اعضا تک نہیں پھیلا تھا۔مجموعی طور پر اس ٹیسٹ نے 70 فیصد سرطانوں کی درست تشخیص کر لی۔جانز ہاپکنز یونیورسٹی کے ڈاکٹر کرسچیئن ٹوماسیٹی نے اس بارے میں بتایا کہ جلد تشخیص بہت اہم ہے۔ میں سمجھتا ہوں کہ اس کے ذریعے سرطان سے ہونے والی اموات پر بڑا اثر پڑے گا۔