موجودہ حالات خاموشی سے فائدہ اٹھا کر پیدا کیے گئے، اب قوم جاگ رہی ہے، نواز شریف، لانگ مارچ اگر پہلے کیا ہوتا تو آج یہ دن نہ دیکھنے پڑتے، کسی کو عدالتیں توڑنے نہیں دیں گے، بہاول پور میں پارٹی کی تنظیم سازی مہم کے دوران ورکرز سے خطاب

بہاولپور (اُردو پوائنٹ اخبار تازہ ترین ۔04 فروری۔ 2010ء) مسلم لیگ (ن) کے رہنما میاں محمد نواز شریف نے کہا ہے کہ موجودہ حالات خاموشی سے فائدہ اٹھا کر پیدا کیے گئے ہیں تاہم اب قوم جاگ رہی ہے ، لانگ مارچ اگر پہلے کیا ہوتا توآج یہ دن نہ دیکھنے پڑتے، کسی کوعدالتیں توڑنے کی اجازت نہیں دیں گے ،آئین توڑ کر ملک نہیں چلائے جا سکتے ۔ بہاول پور میں پارٹی کی تنظیم سازی مہم کے دوران ورکرز سے خطاب کرتے ہوئے نواز شریف نے کہا کہ صدر زرداری نے وعدے پورے نہیں کیے جس سے بہت دل دکھا ،آمر کی باقیات آج بھی موجود ہیں ، ایک آمر نے ججوں کو نظر بند کیا اور چیف جسٹس کی کراچی آمد پر لاشوں کے ڈھیر لگا دیے ،بلوچستان میں اکبر بگٹی کا قتل کر علیحدگی پسندوں کی تحریکوں کو جنم دیا تاہم اس کا احتساب کرنے کے بجائے اسے گارڈ آف آنر پیش کیا گیا ۔

(جاری ہے)

نواز شریف نے کہا کہ عدلیہ کی بحالی دو بار وزیر اعظم بننے سے زیادہ تھی ۔اپنے خطاب کے دوران انہوں نے کارکنان سے وعدہ لیا کہ آئندہ کسی ظلم کا ساتھ نہیں دیں گے اور پاکستان کی تقدیر بدل دیں گے ۔ ملک میں ہرطرف بے چینی ہے اورپاکستان اس وقت مشکلات میں گھرا ہوا ہے۔ ہمیں اقتدار کی خواہش کو دفن کرنا ہوگا۔ انہوں نے کہا کہ سابق صدر پرویز مشرف اور چودھریوں نے ملسم لیگ کو ختم کرنے کی کوشش کی ۔ آج سابق صدر کو کوئی نہیں روک رہا وہ وطن واپس آنے کو تیار نہیں ۔ انہوں نے کہا کہ سابق صدر نے اپنی کتاب میں پاکستانیوں کو بیچنے کا اعتراف کر کے اپنے ہاتھون اپنے خلاف ایف آئی آر کاٹی ہے۔