پاکستان کے پروگرام کا پہلا سہ ماہی جائزہ لینے کیلئے آئی ایم ایف مشن اکتوبر کے آخر میں دورہ کرے گا، اعلامیہ

اسلام آباد (اُردو پوائنٹ اخبارتازہ ترین - این این آئی۔ 20 ستمبر2019ء) آئی ایم ایف عملے کا دورہ پاکستان مکمل ہو گیا ،پاکستان کے پروگرام کا پہلا سہ ماہی جائزہ لینے کیلئے آئی ایم ایف مشن اکتوبر کے آخر میں دورہ کرے گا۔آئی ایم ایف اعلامیہ جاری کے مطابق آئی ایم ایف کے وفد نے اسلام آباد اور کراچی کا دورہ کیا ،دورے میں ملک کی معاشی پالیسیوں پر عملدرآمد پر بات چیت کی گئی ۔

اعلامیہ کے مطابق پاکستان کا معاشی پروگرام اچھے آغاز کے ساتھ آگے بڑھ رہا ہے ،مضبوط اور پائیدار ترقی کیلئے ضروری اصلاحات پر عملدرآمد درکار ہے ۔ اعلامیہ کے مطابق پاکستان کے پروگرام کا پہلا سہ ماہی جائزہ لینے کیلئے آئی ایم ایف مشن اکتوبر کے آخر میں دورہ کرے گا ۔اعلامیہ کیمطابق پاکستان نے ایکسچینج ریٹ کو مارکیٹ کے ساتھ منسلک کردیا جس کے مثبت اثرات آئے ۔

(جاری ہے)

اعلامیہ میں کہاگیاکہ بیرونی سرمائے میں توازن آیا ایکسچینج ریٹ میں یک دم تبدیلی کم ہوئی جبکہ زری پالیسی سے مہنگائی کم کرنے میں مدد ملی،ملک کی ٹیکس وصولیوں میں ڈبل ڈیجٹ اضافہ ہوا ،ایف بی آر نے ٹیکس انتظامیہ کو بہتر بنانے کیلئے متعدد اقدامات کیئے ،آئی ایم ایف مشن نے گذشتہ مالی سال کے خراب مالیاتی نتائج کا جائزہ لیا ۔اعلامیہ میں کہاگیاکہ گزشتہ مالی سال کے مالیاتی نتائج رواں مالی سال کے اہداف پر اثر انداز نہیں ہوں گے ،پروگرام میں طے سماجی شعبے کی بہتری کیلئے اقدامات پر عملدرآمد شروع کر دیا گیا ہے ۔

اعلامیہ میں کہاگیاکہ رواں مالی سال پاکستان کی شرح نمو 2 اعشاریہ 4 فیصد رہنے کا امکان ہے ،آئندہ مہینوں میں مہنگائی کی شرح میں کمی کا اندازہ ہے تاہم معیشت کو ابھی بھی اندرونی اور بیرونی چیلنجز اور خطرات لاحق ہیں۔ اعلامیہ میں کہاگیاکہ ان چیلنجز سے نمٹنے کیلئے ضروری ہے کہ اصلاحات ایجنڈا پر تیز تر بنیاد پر عملدرآمد کیا جائے