عمران خان کو آج سپریم کورٹ میں نیب ترمیمی بل کیس کی کارروائی کے دوران بذریعہ ویڈیو لنک پیش کیا جائے گا

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔16مئی۔2024 ) پاکستان تحریک انصاف کے بانی چیئرمین اور سابق وزیراعظم عمران خان کو آج سپریم کورٹ میں نیب ترمیمی بل کیس کی کارروائی کے دوران بذریعہ ویڈیو لنک پیش کیے جانے کا امکان ہے اس کیس کی گذشتہ سماعت کے دوران سپریم کورٹ کے چیف جسٹس قاضی فائز عیسی نے حکومت کو احکامات جاری کیے تھے کہ وہ آئندہ سماعت کے دوران عمران خان کو اس کیس کی کارروائی میں شامل ہونے اور اپنے دلائل دینے کے لیے درکار ضروری انتظامات کریں.

(جاری ہے)

سپریم کورٹ نے یہ ہدایت بھی جاری کی تھی کہ عمران خان کی بذریعہ ویڈیو لنک پیشی کے انتظامات کو یقینی بنایا جائے اس کیس کی سماعت چیف جسٹس کی سربراہی میں سپریم کورٹ کا چھ ر±کنی بینچ آج دن ساڑھے گیارہ بجے کرے گا. یاد رہے کہ نیب کے قانون میں 27 ترامیم سے متعلق ایک بِل گذشتہ قومی اسمبلی اور سینیٹ سے مئی 2022 میں منظور کیا گیا تھا تاہم صدر عارف علوی نے اس بِل پر دستخط کرنے سے انکار کر دیا تھا جس کے بعد پی ڈی ایم کی حکومت نے جون 2022 قومی اسمبلی اور سینیٹ کا مشترکہ اجلاس بلا کر اس مسودہ قانون کی منظوری حاصل کر لی تھی.

اس قانون سازی کے تحت بہت سے معاملات کو نیب کے دائرہ اختیار سے نکال دیا گیا تھا اور یہ بھی کہا گیا تھا کہ ان ترامیم کو قومی احتساب آرڈیننس 1999 کے آغاز سے نافذ العمل سمجھا جائے گا سابق وزیر اعظم عمران خان نے نیب کے قوانین میں ان ترامیم کے خلاف سپریم کورٹ سے رجوع کیا تھا اور اپنی درخواست میں وفاق اور نیب کو فریق بنایا تھا اور اس میں کہا گیا تھا کہ نیب کے قانون کے سیکشن 2،4،5، 6،25، 26 14،15، 21، 23 میں کی جانے والی ترامیم آئین پاکستان کے آرٹیکل 9، 14، 19اے, 24, 25 کے منافی ہیں.

چیئرمین پی ٹی آئی کی جانب سے عدالت سے استدعا کی گئی تھی کہ ان تمام ترامیم کو کالعدم قرار دیا جائے 15 ستمبر 2023 کو سابق چیف جسٹس عمر عطا بندیال کی سربراہی میں تین رکنی بینچ نے دو، ایک کی اکثریت سے نیب آرڈیننس میں ترامیم کے خلاف سابق وزیر اعظم عمران خان کی درخواست کو قابل سماعت قرار دیتے ہوئے نیب ترامیم کو کالعدم قرار دے دیا تھا. دوسری جانب نجی ٹی وی کے مطابق سپریم کورٹ میں آج عمران خان کی ویڈیو لنک کے ذریعے حاضری کے انتظامات راولپنڈی اڈیالہ جیل میں مکمل کرلیے گئے جیل ذرائع کے حوالے سے بتایا گیا ہے کہ اڈیالہ جیل کی انتظامیہ نے سابق وزیراعظم کو ویڈیو لنک کے ذریعے حاضری سے متعلق بتا دیا ہے، سپریم کورٹ کے عملے اور جیل حکام نے ویڈیو لنک کنکشن پر رابطہ بھی کیا ہے.

ذرائع کا کہنا ہے کہ عمران خان کی پیشی سے قبل ویڈیو لنک کا ٹیسٹ بھی کیا جائے گا عمران خان کی ویڈیو لنک کے ذریعے حاضری سپریم کورٹ کے حکم پر کی جارہی ہے. ذرائع نے بتایا ہے کہ نیب ترامیم کیس میں عمران خان ویڈیو لنک پر دن ساڑھے 11بجے سپریم کورٹ میں پیش ہوں گے جیل ذرائع کے مطابق کل وکیل خواجہ حارث اور انتظار پنجوتھہ نے جیل میں عمران خان سے مختصر ملاقات بھی کی تھی.