نائب وزیراعظم اور وزیر خارجہ سینیٹر محمد اسحاق ڈار کاسعودی عرب کے وزیر خارجہ شہزادہ فیصل بن فرحان بن عبداللہ سے ٹیلی فونک رابطہ

اتوار 19 مئی 2024 22:00

اسلام آباد (اُردو پوائنٹ اخبارتازہ ترین - اے پی پی۔ 19 مئی2024ء) نائب وزیراعظم اور وزیر خارجہ سینیٹر محمد اسحاق ڈار نے سعودی عرب کے وزیر خارجہ شہزادہ فیصل بن فرحان بن عبداللہ سے ٹیلی فونک رابطہ کیا، دونوں رہنمائوں نے پاکستان اور سعودی عرب کے درمیان مضبوط دوطرفہ تعلقات پر تبادلہ خیال کیا اور مختلف شعبوں میں تعاون کو مزید مستحکم کرنے کے لئے مختلف مواقع تلاش کیے۔

(جاری ہے)

اتوارکو دفتر خارجہ کی طرف سے جاری بیان کے مطابق گفتگو کے دوران دونوں رہنمائوں نے پاکستان اور سعودی عرب کے درمیان گہری اور پائیدار شراکت داری کو اجاگر کیا۔گفتگو کے دوران سعودی ولی عہد اور وزیراعظم شہزادہ محمد بن سلمان کے دورہ پاکستان کی تیاریوں کا جائزہ لیا گیا۔ پاکستان کے نائب وزیر اعظم اسحاق ڈار نے کہا ہے کہ پاکستان کے عوام باہمی اتفاق رائے سے طے شدہ تاریخ پر سعودی ولی عہد اور وزیراعظم شہزادہ محمد بن سلمان کے دورے کے منتظر ہیں۔ وزرائے خارجہ نے غزہ کی سنگین صورتحال اور باہمی دلچسپی کے دیگر اہم علاقائی اور عالمی واقعات پر بھی تبادلہ خیال کیا۔ دونوں رہنمائو ں نے مشترکہ کوششوں اور مذاکرات کے ذریعے خطے میں امن و استحکام کو فروغ دینے کے عزم کا اعادہ کیا۔