اسپشل انویسٹمنٹ فیسلی ٹیشن کونسل دیگر اداروں کی بہتری اور ملکی استحکام کیلئے ٹھوس بنیادوں پر اقدامات کرے گا،صوبائی وزیر

کراچی (اُردو پوائنٹ اخبارتازہ ترین - اے پی پی۔ 23 مئی2024ء) صوبائی وزیر توانائی اور ترقیات و منصوبابندی سید ناصر حسین شاہ نے کہا ہے کہ اسپشل انویسٹمنٹ فیسلی ٹیشن کونسل(ایس آئی ایف سی) ہمارا ادارہ ہے جوکہ دیگر اداروں کی بہتری اور ملکی استحکام کیلئے ٹھوس بنیادوں پر اقدامات کرے گا۔ جمعرات کو جاری کردہ اعلامیہ کے مطابق ان خیالات کا اظہار انہوں نے سندھ اسمبلی میں پاکستان پیپلز پارٹی پنجاب کے سینئر رہنماؤں کے ہمراہ میڈیا کے نمائندوں سے بات چیت کرتے ہوئے کیا۔

انہوں نے کہا کہ سیاحتی ادارے سندھ حکومت کے پاس ہی رہیں گے ، یہ ادارہ سندھ حکومت کے اشتراک و باہمی تعاون سے اقدامات کرے گا اس سلسلے میں وزیراعلی سندھ اور ایس آئی ایف سی کے درمیان اجلاس ہوا جس میں ادارے نے سندھ حکومت کو یقین دھانی کرائی کہ وہ جو بھی اقدامات کریں گے سندھ حکومت کو اعتماد میں لے کر اور باہمی رضامندی سے کریں گے۔

(جاری ہے)

سید ناصر شاہ نے کہا کہ ایس آئی ایف سی کے حوالے سے حتمی اقدامات کے فیصلے کا اختیار سندھ حکومت کے پاس ہی ہوگا۔

انہوں نے کہاکہ ادارے کے حوالے سے بہت سی افواہیں اور تحفظات کی خبریں آرہی ہیں جن میں کوئی صداقت نہیں ہے ، صرف قیاس آرائیاں ہیں ۔انہوں نے کہا کہ سندھ حکومت اور ایس آئی ایف سی ملکر ملک کی بہترین کیلئے کام کر رہے ہیں۔ انہوں نے کہا کہ صوبہ سندھ میں 5700ترقیاتی اسکیموں پر کام جاری ہے، نئے بجٹ میں ان تمام اسکیموں کو ترجیح دی جائے گی تاکہ عوام کے وسیع تر مفاد میں جاری ان تمام اسکیموں کو 2024تک معیار کے ساتھ مکمل کیا جاسکے۔

انہوں نے کہا کہ ہمارے بچے ، بیٹے و بیٹیاں کرغستان میں پھنسے ہوئے ہیں۔ چیئرمین بلاول بھٹو کی ہدایت پر انہیں واپس لانے کیلئے اقدامات کررہے ہیں، جس طرح وفاق نے اس سلسلے میں اپنا رول ادا کیاہے اسی طرح سندھ حکومت بھی اپنا بھرپور رول ادا کرتے ہوئے عملی اقدامات میں مصروف ہے۔ بچوں کو وطن واپس لانے کیلئے اسپشل فلائیٹ کا اہتمام کررہے ہیں جس کے تمام اخراجات سندھ حکومت برداشت کرے گی۔