شدید گرمی ،ہیٹ ویو کے خدشات، پنجاب میں کالجز کے اوقات کار تبدیل

لاہور(اردو پوائنٹ اخبارتازہ ترین۔21 مئی 2024 ) شدید گرمی اور ہیٹ ویو کے خدشات کے پیش نظرمحکمہ ہائرایجوکیشن پنجاب نے کالجز کے اوقات کار تبدیل کر دئیے،کالجز صبح ساڑھے 7 سے ساڑھے 11 بجے تک لگیں گے۔جمعہ کے روز بھی کالجز کے اوقات کار صبح ساڑھے سات سے گیارہ ہوں گے۔محکمہ ہائر ایجوکیشن پنجاب کے مطابق سیکنڈ شفٹ شام 4 بجے سے رات 8 بجے تک ہو گی۔ محکمہ ہائر ایجوکیشن نے تمام کالجوں کے سربراہان کو مراسلہ ارسال کر دیا۔

محکمہ ہائرایجوکیشن کا کہنا ہے کہ 21 سے 31 مئی تک ہیٹ ویو کے خدشات کے پیش نظر اوقات کار تبدیل کئے گئے ہیں۔دوسری جانب محکمہ موسمیات کے مطابق سندھ اور پنجاب میں آج سے 23 مئی کے دوران دن کا درجہ حرارت معمول سے 4 سے 6 ڈگری سینٹی گریڈ زیادہ جبکہ 23 سے 27 مئی کے دوران 6 سے 8 ڈگری سینٹی گریڈ زیادہ رہنے کا امکان ہے۔

(جاری ہے)

محکمہ موسمیات کا کہنا ہے کہ آج سے27 مئی تک ملک کے بیشتر علاقوں میں گرمی کی لہر کا امکان ہے۔

اسلام آباد، خیبرپختونخوا، کشمیر، گلگت بلتستان اور بلوچستان میں آج سے 27 مئی کے دوران دن کا درجہ حرارت معمول سے 4 سے 6 ڈگری سینٹی گریڈ زیادہ رہے گا۔ پی ڈی ایم اے پنجاب نے بھی 21 سے27 مئی کے دوران ہیٹ ویو الرٹ جاری کیا ہے اور ضلعی انتظامیہ کو ہیلپ لائن، مساجد میں اعلانات اور میڈیا کے ذریعے آگاہی کی ہدایت کی گئی ہے۔پی ڈی ایم اے پنجاب نے ہسپتالوں میں خصوصی کاو¿نٹر بنانے اورادویات کی دستیابی یقینی بنانے اور محکمہ صحت کو ڈاکٹرز اور پیرا میڈیکل سٹاف کی چھٹیاں منسوخ کرنے کی بھی ہدایات کی ہے۔

اس کے علاوہ اسکول ٹائمنگز میں کمی کے ساتھ 5 سال کی عمر تک کے بچوں کو چھٹیاں دینے کی ہدایت بھی کی گئی ہے۔یاد رہے کہ گزشتہ روزپنجاب میں تمام سرکاری اور غیر سرکاری سکول ہیٹ ویو کے پیش نظر 25 مئی سے 31 مئی تک بند رکھنے کا اعلان کر دیاگیاتھا۔محکمہ سکولز ایجوکیشن نے سرکاری ونجی تعلیمی اداروں میں تعطیلات کے نوٹیفیکیشن جاری کر دیا گیا۔ نوٹیفیکیشن کے مطابق تمام سرکاری اور غیر سرکاری سکول ہیٹ ویو کے پیش نظر 25 مئی سے 31 مئی تک بند رہیں گے۔ تاہم جن سکولوں میں امتحانات منعقد کئے جا رہے ہیں انہیں تمام احتیاطی تدابیر اپناتے ہوئے امتحانات کیلئے اجازت دی گئی تھی۔اس سے قبل پنجاب بھر کے تعلیمی اداروں میں یکم جون سے موسم گرما کی تعطیلات کا نوٹیفکیشن بھی جاری کر دیا گیا تھا۔