وزیراعلیٰ پنجاب مریم نوازشریف سے گورنر پنجاب سردار سلیم حیدر خان کی ملاقات ، پنجاب کی بہتری، پائیدار ترقی اورشہریوں کا معیار زندگی بہتر بنانے کیلئے مل کر کام کرنے کے عزم کا اظہار

لاہور (اُردو پوائنٹ اخبارتازہ ترین - اے پی پی۔ 16 مئی2024ء) وزیراعلی پنجاب مریم نوازشریف سے گورنر پنجاب سردار سلیم حیدر خان نے جمعرات کو جاتی امرا میں ملاقات کی ۔ وزیر اعلی مریم نواز شریف نے انہیں گورنر پنجاب کا منصب سنبھالنے پر مبارکباد دی اور صوبے کی ترقی کیلئے مختلف اہم امور پر تبادلہ خیال کیا گیا۔ملاقات میں دونوں رہنمائوں نے پنجاب کی بہتری، پائیدار ترقی اورشہریوں کا معیار زندگی بہتر بنانے کیلئے مل کر کام کرنے کے عزم کا اظہار کیا گیا نیز اقتصادی ترقی، گورننس، تعلیم، صحت کی سہولیات، امن و امان اور موسمیاتی تبدیلی سمیت دیگر اہم امور پربھی گفتگو کی گئی۔

ملاقات میں پنجاب کے عوام کی فلاح و بہبود کے لئے مل کر کام کرنے کے عزم کا اعادہ کیا گیا۔اس موقع پر گفتگو کرتے ہوئے وزیر اعلی پنجاب مریم نواز شریف نے کہا کہ ہر آئینی عہدے کا احترام کرتے ہیں، کوشش ہوگی کہ صوبے میں قانون کی حکمرانی ہو۔

(جاری ہے)

انہوں نے کہا کہ گورنر ایک آئینی عہدہ ہے جو صوبوں اور وفاق کے درمیان ایک رابطے کا ذریعہ ہے۔وزیر اعلی نے کہا کہ صوبہ بھر میں بے نظیر انکم سپورٹ پروگرام کو مزید موثربنایا جارہا ہے۔

انہوں نے کہا کہ پنجاب میں تعلیم، صحت، روڈ انفراسٹرکچر اور انفارمیشن ٹیکنالوجی کے متعدد پراجیکٹس کا آغاز کیا گیا ہے۔ مریم نواز شریف نے کہا کہ محروم طبقات کی زندگی میں آسانی کیلئے خصوصی سوشل پروٹیکشن پروگرام شروع کئے ہیں اور صوبے کے عوام کو ریلیف دینے کی ہر ممکن کوشش کی جائے گی۔ گورنر پنجاب سلیم حیدر خان نے اس موقع پر گفتگو کرتے ہوئے کہا کہ ہمارا فوکس عوام کی خدمت ہے۔

انہوں نے کہا کہ ملک و قوم کی ترقی، خوشحالی اور استحکام کیلئے تمام سیاسی پارٹیوں کو باہمی اختلافات پس پشت ڈال کر ایک پیج پر ہونا چاہئے۔ گورنر پنجاب نے کہا کہ وفاق اور پنجاب حکومت کے درمیان رابطے بہتر کرنے میں بھر پور طریقے سے کردار ادا کروں گا۔انہوں نے کہا کہ آئین اور قانون کی عملداری یقینی بنانے کیلئے پنجاب حکومت کو گورنر ہائوس سے مکمل تعاون حاصل ہوگا۔ اس موقع پرسینیٹر پرویز رشید، سینئر صوبائی وزیر مریم اورنگزیب، وزیر اطلاعات عظمی زاہد بخاری اور دیگر رہنما بھی موجود تھے۔