لکی مروت میں ایک ہی خاندان کے 11 افراد کے قتل کا مقدمہ درج

جمعرات 11 جنوری 2024 16:16

لکی مرو ت(اُردو پوائنٹ اخبارتازہ ترین - این این آئی۔ 11 جنوری2024ء) لکی مروت میں ایک ہی خاندان کے 11 افراد کے قتل کا مقدمہ درج کرلیا گیا، مقتولین کے چچا نے مقدمے میں مقتولہ کے سسر کو نامزد کیا ہے۔پولیس کے مطابق خیبرپختونخوا کے ضلع لکی مروت کے علاقے تختی خیل میں 11 افراد کے قتل کا مقدمہ مقتولین کے چچا عمر گل کی مدعیت میں مقتولہ کے سسر مدر خان کے خلاف درج کر لیا گیا ہے۔

(جاری ہے)

پولیس حکام کے مطابق مدعی نے مؤقف اختیار کیا ہے کہ ملزم مدر خان کی بہو ناراض ہوکر میکے آگئی تھی، جس کا ملزم کو رنج تھا، ملزم معاملے کو حل کرنے کے بہانے مہمان بن کر آیا اور اہل خانہ کے ساتھ رات گزاری۔عمر گل نے مقدمے میں مؤقف اختیار کیا کہ ملزم مدر خان نے تمام افراد کو نشہ آور کھانا کھلانے کے بعد فائرنگ کرکے قتل کردیا۔پولیس کے مطابق قتل ہونے والوں میں 2 مرد، 2 خواتین اور 6 بچے بھی شامل ہیں اور تمام افراد کا تعلق ایک ہی خاندان سے ہے۔پولیس حکام کے مطابق ایک ہی خاندان کے 11 افراد کے قتل میں نامزد ملزم مدر خان کی گرفتاری کیلئے کوششیں جاری ہیں۔