نواب شاہ،زمین کے تنازع پر فائرنگ، 7افراد جاں بحق، 8زخمی، کشیدگی برقرار

نواب شاہ(اُردو پوائنٹ اخبارتازہ ترین - این این آئی۔ 24 مارچ2024ء) نواب شاہ کے قریب گائوں حاجی واحد بخش ڈاہری میں زرعی زمین کے تنازع پر ڈاہری برادری کے دو گروہوں میں تصادم کے نتیجے میں7افراد جاں بحق اور8زخمی ہوگئے۔ علاقے میں کشیدہ صورتحال کے باعث ضلع بھر کی پولیس نفری طلب کرلی گئی۔ وزیر اعلی سندھ مراد علی شاہ نے واقعہ کا نوٹس لیتے ہوئے آئی جی پولیس سے رپورٹ طلب کرلی ہے۔

ڈاہری برادری کے درمیان تصادم گزشتہ صبح کے وقت زرعی زمین پر ہوا۔دونوں گروہوں نے ایک دوسرے پر اندھا دھند فائرنگ کی جس کے نتیجے میں ایک گروپ کا ایک شخص اور دوسرے گروپ کے 6 افراد موقع پر ہی ہلاک ہوگئے جبکہ 8سے افراد زخمی ہوئے۔واقعہ کی اطلاع پر ضلع بھر کی پولیس کو طلب کرلیا گیا جس نے صورتحال کو کنٹرول کرنے کے بعد ہلاک ہونے والے سات افراد اور8زخمیوں کو مقامی اسپتال پہنچایا۔

(جاری ہے)

پولیس کے مطابق علاقے میں صورتحال تشویشناک ہے، دونوں گروہوں کے مسلح افراد موجود ہیں جبکہ پولیس کی بھاری نفری کو کسی بھی صورتحال سے نمٹنے کے لئے تعینات کیا گیا ہے۔ہلاک و زخمی ہونے والوں کا تعلق ڈاہری برادری سے ہے۔دوسری جانب وزیراعلی سندھ سید مراد علی شاہ نے نواب شاہ کے قریب گاں حاجی واحد بخش ڈاہری میں زمین کے تنازع پر تصادم میں 7 افراد کی ہلاکت کا نوٹس لیتے ہوئے آئی جی سندھ کو واقعے کی تفصیلی رپورٹ پیش کرنے کا حکم دے دیا۔

وزیراعلی سندھ نے کہا کہ افسوس ہوا رمضان المبارک کے مہینے میں ایسا واقع ہوا ہے، علاقے میں امن قائم کرنے کے لئے فوری طور پر اقدامات کیے جائیں۔آئی جی پولیس سندھ نے وزیراعلی کو آگاہ کیا کہ نواب شاہ کے قریب گائوں حاجی واحد بخش ڈاہری میں زمین کے تنازع پر تصادم ہوا، جاں بحق افراد کی لاشوں اور زخمیوں کو اسپتال منتقل کردیا، کشیدہ صورتحال کے باعث ضلع بھر کی پولیس الرٹ کیا ہے، پولیس کی بھاری نفری کو تعنیات کیا گیا ہے، ڈاہری برادری میں زمین کے تنازع پر 7 افراد ہلاک اور 8 افراد زخمی ہوگئے۔