کیمپ نو میں شاندار کارکردگی کے بعدبارسلونا کے ہیڈ کوچ ہانسی فلک کا بیان،لامین یمل بیلنز ڈی اور ایوارڈ کے مستحق ہیں

بارسلونا (اُردو پوائنٹ اخبارتازہ ترین - اے پی پی۔ 10 ستمبر2026ء) بارسلونا کے کوچ ہانسی فلک نے نوجوان سٹار لامین یمل کو بیلن ڈی اور کا مضبوط امیدوار قرار دیتے ہوئے کہا ہے کہ وہ یہ اعزاز جیتنے کا حقدار ہے۔ای ایس پی این کے مطابق لامین یمل نے بارسلونا کی نمائندگی کرتے ہوئے فینورڈ کے خلاف چیمپئنز لیگ کے میچ میں شاندار فری کک پر گول کیا اور 2 گول بنانے میں معاونت کی، جس کی بدولت بارسلونا نے 1-5 سے کامیابی حاصل کی۔

یہ رواں سیزن میں لامین یمل کا 5واں گول ہے۔ہانسی فلک نے کہا کہ لامین یمل ہر میچ میں اپنی غیر معمولی صلاحیت ثابت کرتا ہے اور اس جیسی خصوصیات کسی اور کھلاڑی میں نظر نہیں آتیں۔ ان کے مطابق لامین یمل بیلن ڈی اور جیتنے کا مستحق ہے۔لامین یمل کو پیر کو بیلن ڈی اور کے لیے 30 کھلاڑیوں کی حتمی فہرست میں شامل کیا گیا تھا، جبکہ ایوارڈ کا اعلان 26 اکتوبر کو لندن میں ہونے والی تقریب میں کیا جائے گا۔

(جاری ہے)

فینورڈ کے خلاف گول لامین یمل کا چیمپئنز لیگ میں 12واں گول تھا، جس کے ساتھ وہ کم عمر کھلاڑیوں کے سب سے زیادہ گول کے ریکارڈ میں کیلین ایمباپے سے صرف 1 گول پیچھے ہیں۔ بارسلونا کے لیے 19 سال اور 58 دن کی عمر میں لامین یمل نے مجموعی طور پر 101 گول معاونتیں مکمل کرلی ہیں، جن میں 54 گول اور 47 معاونتیں شامل ہیں۔بیلن ڈی اور کی دوڑ میں لامین یمل کو کیلین ایمباپے، بائرن میونخ کے ہیری کین اور گزشتہ سال کے فاتح عثمان ڈیمبیلے سمیت کئی بڑے کھلاڑیوں سے سخت مقابلہ درپیش ہے۔

ہانسی فلک نے بارسلونا کے رافینیا اور پیڈری کو بیلن ڈی اور کی فہرست میں شامل نہ کیے جانے پر بھی حیرت کا اظہار کرتے ہوئے کہا کہ دونوں کھلاڑی اتنے اچھے ہیں کہ انہیں فہرست میں ہونا چاہیے تھا۔رافینیا نے بھی فینورڈ کے خلاف 2 گول کرکے شاندار فارم کا مظاہرہ کیا۔ وہ بارسلونا کی جانب سے ابتدائی 5 میچوں میں مسلسل گول کرنے والے 1950 کے بعد پہلے کھلاڑی بن گئے ہیں۔ رواں سیزن میں بارسلونا اب تک 22 گول کرچکا ہے۔ہانسی فلک نے ٹیم کی کارکردگی پر اطمینان کا اظہار کرتے ہوئے کہا کہ بارسلونا اچھی پیش رفت کررہا ہے، تاہم سیزن ابھی طویل ہے اور ٹیم کو مزید بہتری کی ضرورت ہے۔