پرجوش اور جذباتی کھلاڑیوں کو لگام ڈالنے کیلئے ییلو کارڈ اور ریڈ کارڈ کے تجربہ کی تجویز
ایمپائر بے لگام کھلاڑیوں کو سمجھائیں گے نہ سمجھنے پر ریڈ کارڈ دکھا کر باہر کا راستہ دکھایا جائیگا، ایم سی سی
جب ریڈ کارڈ کی طاقت ہاتھ میں ہو گی تو ایمپائرز زیادہ اعتماد سے فیصلے کریں گے، سابق کرکٹرز
جمعرات 11 فروری 2016
13:34
لاہور (اُردو پوائنٹ اخبارتازہ ترین - آن لائن۔11 فروری۔2016ء)کرکٹ میں کھلاڑیوں کے درمیان لڑائی جھگڑا تو عام سی بات ہے لیکن ایسے ہر موقع پر امپائر سوائے میچ ریفری کو شکایت کرنے کے اور کچھ نہیں کر سکتا۔ اب ایم سی سی نے تجویز دی ہے کہ کرکٹ میں بھی کھلاڑیوں کو ریڈ کارڈ دکھا کر میدان بدر کرنے کا تجربہ کیا جائے۔ تفصیلات کے مطابق کرکٹ کے پرجوش اور جذباتی کھلاڑیوں کو اب ہوشیار ہو جانے کی ضرورت ہے کیونکہ ان کے غصے کا خمیازہ انہیں میدان سے باہر نکالنے پر مجبور کر سکتا ہے۔
(جاری ہے)
جی ہاں فٹ بال اور ہاکی کی طرز پر اب کرکٹ میں بھی ییلو کارڈ اور ریڈ کارڈ کا تجربہ کیا جائے گا۔ امپائر ییلو کارڈ دکھا کر بے لگام کھلاڑیوں کو سمجھائیں گے پھر بھی نہ سمجھے تو ریڈ کارڈ سے باہر کا رستہ دکھائیں گے۔ کرکٹ کے قوانین بنانے والے ادارے میرلبون کرکٹ کلب نے انگلینڈ میں ڈومیسٹک میچوں کے دوران کارڈ سسٹم کا تجربہ کرنے کی تجویز دی ہے۔ اگر تجربہ کامیاب رہا تو پھر اسے انٹرنیشنل کرکٹ میں بھی آزمایا جائے گا۔ سابق کرکٹرز کا کہنا ہے کہ دیگر کھیلوں کی طرح کرکٹ میں بھی اب امپائرز اور ریفریز کو زیادہ بااختیار بنانے کی ضرورت ہے۔ جب ریڈ کارڈ کی طاقت ہاتھ میں ہو گی تو امپائرز زیادہ اعتماد سے فیصلے کریں گے۔
