حیدرآباد میں باران رحمت کے بعد موسم خوشگوار ہوگیا، لوگ خوشی سے جوم اُٹھے

حیدرآباد(پوائنٹ اخبار تازہ ترین۔25جولائی۔2014ء) حیدرآباد جمعرات کی شب سے شروع ہونیو الی باران رحمت کے بعد موسم خوشگوار ہوگیا، لوگ خوشی سے جوم اُٹھے ، منچلے نوجوان سڑکوں پر نکل آئے اور بارش سے لطف اندوز ہوتے رہے، جبکہ جمعرات کی رات ہونے والی بارش جمعہ کی رات گئے تک جاری رہی جس کے باعث شہر کے نشیبی علاقے زیر آب آنے سے بلدیاتی اداروں اور ضلعی حکومت کا پول کھل گیا ، بارش کا پہلا قطرہ گرتے ہی حیسکو کی جانب سے بجلی بند کردی گئی، سارا دن وقفے وقفے سے بجلی بند ہوتی رہی ، حیدرآبا دکے گنجان آباد علاقے پھلیلی پریٹ آباد، گجراتی پاڑہ، فقیر کاپڑ، کلاتھ مارکیٹ، نیوچالی، فردوس کالونی، ہالاناکہ، گئوشالہ ، لیاقت کالونی ، الوحید کالونی، امریکن کوارٹر ، سبزی منڈی ، ریلوے کالونی ، مکرانی پاڑہ سمیت حیدرآباد ،لطیف آباد اور قاسم آباد کے بیشتر علاقے پانی میں ڈوب گئے ، سب سے زیادہ صورتحال قاسم آباد میں خراب ہوئی جہاں علاقوں میں گھٹنوں گھٹنوں پانی بھر گیا ، واسا کا نکاسی آب کا نظام مکمل طورپر بیٹھ گیا جس کے باعث لاکھوں کی آبادی گھروں میں محصور ہوکر رہ گئی ۔

(جاری ہے)

اُدھر حیدرآباد کے 90فیصد علاقوں میں جمعہ کی صبح 4بجے بجلی بند ہوئی جو دوپہر 1بجے بحال ہوسکی اس کے بعد سے بھی سارا دن بجلی کی آنکھ مچولی جاری رہی۔ تاہم بارش کے بعد گرمی کا زور ٹوٹ گیا جبکہ بارش کے باعث بازاروں میں سناٹا چھاگیا اور عید کی خریداری متاثر ہوئی۔