وفاقی دارالحکومت سمیت پنجاب اور خیبر پختونخواہ کے متعددعلاقے شدید دھند کی لپیٹ میں آگئے

لاہور/ پشاور/ کوئٹہ/ ملتان(اُردو پوائنٹ تازہ ترین اخبار۔ 17 دسمبر 2014ء) وفاقی دارالحکومت سمیت پنجاب اور خیبر پختونخواہ کے متعددعلاقے شدید دھند کی لپیٹ میں آگئے، حدنگاہ صفر ، موٹروے کو ٹریفک کیلئے بند کیاگیا، جنوبی پنجاب میں دھند کی شدت میں اضافہ کے باعث ٹرینوں کا شیڈول شدید متاثر ،محکمہ موسمیات کی آئندہ دو سے تین روز تک خیبرپختونخوا ، پنجاب کے میدانی علاقوں اور سندھ کے بالائی علاقوں میں صبح کے وقت دھند پڑنے کی پیشگوئی ، کوئٹہ سمیت بلوچستان کے مختلف علاقے شدید سردی کی لپیٹ میں ، درجہ حرارت نقطہ انجماد سے نیچے گرنے سے معمولات زندگی مفلوج ہو کر رہ گئے ۔

خیبرپختونخوا اور پنجاب کے میدانی علاقے شدید دھند کی لپیٹ میں آگئے ۔ موٹروے ایم ون پشاور سے برہان شدید دھند چھائی رہی۔

(جاری ہے)

ایم ون پر حد نظر بیس میٹر رہ گئی۔ موٹروے ایم ٹو پر اسلام آباد سے چکری انٹرچینج حد نظر 10 سے 30 میٹر ریکارڈ کی گئی۔ دھند کے باعث ایم ٹو پر بھیرہ سے شیخوپورہ تک حد نگاہ 10 میٹر تک رہ گیا۔ راوی ٹول پلازہ سے کالاشاہ کاکو تک حد نظر صفر ہوگئی جس پر موٹر وے ایم ٹو کو بند کر دیا گیا۔

موٹروے ایم تھری پنڈی بھٹیاں سے فیصل آباد کو بھی حد نگاہ صفر ہونے پر بند کر دیا گیا۔ جنوبی پنجاب میں دھند کی شدت میں اضافہ کے باعث ٹرینوں کے شیڈول شدید متاثر ہوا ۔ کراچی سے لاہور جانے والی نائٹ کوچ چار گھنٹے ، کراچی سے حویلیاں جانے والی ہزارہ ایکسپریس چار گھنٹے ، پاکستان ایکسپریس تین گھنٹے ، زکریا ایکسپریس دو گھنٹے جبکہ لاہور سے کراچی جانے والی عوامی ایکسپریس دو گھنٹے تاخیر کا شکار ہوئی۔

ریلوے حکام کے مطابق ریلوے سٹیشن پر ٹرینوں کی تاخیر کا سبب دھند کے باعث حد نگاہ پچاس میٹر ہونا ہے۔ شدید دھند کے باعث ملتان ائیرپورٹ کو بھی بند کر دیا گیا اور کراچی سے لاہور جانے والی پرواز پی کے 386 منسوخ کر دی گئی۔ موٹروے حکام نے شہریوں کو غیرضروری سفر سے گریز کر نے کی ہدایت کی ۔ فوگ لائٹس استعمال تمام احتیاطی تدابیر استعمال کرنے کی ہدایت بھی کی گئی ہے۔

آئندہ دو سے تین روز تک خیبرپختونخوا ، پنجاب کے میدانی علاقوں اور صوبہ سندھ کے بالائی علاقوں میں صبح کے وقت دھند پڑنے کی پیشگوئی کی ۔ کوئٹہ سمیت بلوچستان کے مختلف علاقے شدید سردی کی لپیٹ میں آگئے اور درجہ حرارت نقطہ انجماد سے نیچے گرنے سے معمولات زندگی مفلوج ہو کر رہ گئے ۔محکمہ موسمیات کے مطابق بیشتر علاقوں میں سردی کی شدت میں اضافہ ہو سکتا ہے تاہم زیادہ تر علاقوں میں بارش ہونے کا کوئی امکان نہیں۔