ملک کے بیشتر علاقوں میں بارش سے موسم خواشگوار،مرجھائے چہرے خوشی سے کھل اٹھے

اسلام آباد (اُردو پوائنٹ اخبار تازہ ترین۔ 21 ستمبر۔2015ء ) ملک کے بیشتر علاقوں میں بارش سے موسم خواشگوار ہوگیا ،جنوبی پنجاب ،سندھ ،خیبرپختونخوا اوربلوچستان میں بارش سے گرمی کے ستائے شہریوں نے سکھ کاسانس لیا ،سب سے زیادہ بارش تھر کے علاقے چھاچھرو میں 107 ملی میٹر ریکارڈ کی گئی ، محکمہ موسمیات نے آئندہ 48 گھنٹوں کے دوران ملک کے اکثر علاقوں میں مزید بارش کی پیشنگوئی کی ،بارش کے باعث ستلج، چناب، راوی اور جہلم کے دریاوٴں، کشمیر اور گلگت بلتستان کے مقامی ندی نالوں میں طغیانی کا خدشہ ہے ۔

محکمہ موسمیات کے مطابق (آج )منگل کولاہور، گوجرانوالہ، راولپنڈی، بہاولپور، ساہیوال، ہزارہ ڈویژن، اسلام آباد اور کشمیر میں اکثر مقامات پر جبکہ سرگودھا، فیصل آباد، ڈی جی خان، ملتان، مالاکنڈ، پشاور، کوہاٹ، مردان ڈویژن، فاٹا اور گلگت بلتستان میں کہیں کہیں تیز ہواوں اور گرج چمک کیساتھ بارش کا امکان ہے۔

(جاری ہے)

جس کے باعث ستلج، چناب، راوی اور جہلم کے دریاوں، کشمیر اور گلگت بلتستان کے مقامی ندی نالوں میں طغیانی کا خدشہ ہے ۔

گزشتہ 24 گھنٹوں کے دوران ریکارڈ کی گئی بارش میں سب سے زیادہ بارش چھاچھرو میں 107 ملی میٹر جبکہ ڈھالی 80، چھور 76، اسلام کوٹ 49، پاراچنار 34، مٹھی 33، بہاولنگر 32، لاہور 27، ڈپلو 13، قصور 15، میر پور خاص 11، سیالکوٹ (ائیر پورٹ)09، نگر پارکر، منڈی بہاوٴالدین 06، میرکھانی 05، بدین، دروش 03، گجرات، ایبٹ آباد، کالام، ژوب، خانپور 02، استور، بہاولپور، بارکھان، پشاور، رحیم یار خان، بھکر 01 ملی میٹر ریکارڈ کی گئی۔گزشتہ روز ریکارڈ کیے گئے گرم ترین مقامات میں سب سے زیادہ درجہ حرارت لسبیلا میں45 ڈگری سینٹی گریڈ جبکہ کراچی 43، پسنی، گوادر، تربت اور سبی میں 42 ڈگری سینٹی گریڈ ریکارڈ کیا گیا۔