کشمیریوں سے اظہار یکجہتی کے لیے کشمیرتھیم سونگ بنانے کا اعلان٬گانے میں معروف فنکار حصہ لیں گی

کراچی(اُردو پوائنٹ اخبارتازہ ترین - این این آئی۔ 15 اکتوبر2016ء) بھارتی مظالم کے خلاف کشمیریوں سے اظہار یکجہتی کے لیے کشمیر تھیم سونگ بنایا جائے گا۔ گانے میں معروف گلوکار بھی پرفارم کریں گے۔ گانا آئی کیو جینئس میڈیا پروڈکشن کی جانب سے تیار کیا جارہا ہے جو 10 دن کے اندر ریلیز کر دیا جائے گا۔ اس بات کا اعلان آئی کیو جینئس میڈیا پروڈکشن کے پروجیکٹ ڈائریکٹر عمر احسن اور معروف گلوکارعمیر جسوال نے فیصل ریاض ملک کے ہمراہ ہفتے کو کراچی پریس کلب میں پریس کانفرنس کے دوران کیا۔

عمر احسن نے کہا کہ بھارت مقبوضہ وادی کشمیر میں عرصہ دراز سے کشمیریوں پر عرصہ حیات تنگ کیے ہوئے ہیں۔اس نے مقبوضہ کشمیر کو دنیا کی سب سے بڑی جیل بنادیا ہے٬ ان مظالم میں اب ایک بار پھر بہت تیزی آگئی ہے اور اب تک ہزاروں معصوم کشمیریوں کو شہید ٬ عمر بھر کے لیے معذور اور زخمی کیا جا چکا ہے۔

(جاری ہے)

انہوں نے کہا کہ کشمیریوں سے اظہار یکجہتی کے لیے کشمیر تھیم سونگ تیار کر کے بھارتی جارحیت اور بربریت کو دنیا بھر میں بے نقاب کیا جائے گا۔

یہ گانا پاکستان کے علاوہ عالمی میڈیا پر بھی نشر کیا جائے گا۔ اس میں ہندی زبان کو بھی شامل کیا گیا ہے تاکہ ہندوستان کے شہری بھی ظلم کے خلاف اس آواز کو سنیں۔ گانے کی تیاری میں عمیر جسوال٬ علی عظمت اورکوک اسٹوڈیو سمیت دیگر مقبول فنکار حصہ لے رہے ہیں۔اس میں حصہ لینے کے خواہش مند مزید فنکار اور اداکاروں کو بھی خوش آمدید کہیں گے۔ عمر احسن نے بتایا کہ پہلے مرحلے پر یہ گانا لانچ کیا جائے گا٬ دوسرے مرحلے پر مزید پروڈکشن بھی کی جائے گی۔

انہوں نے کہا کہ پاکستانی عوام کے دل مقبوضہ وادی کے کشمیریوں کے ساتھ دھڑکتے ہیں اور وہ ان کی بھارتی تسلط سے آزادی کے لیے ہر سطح پر ان کی اخلاقی اور سفارتی حمایت جاری رکھیں گے۔ عمر احسن نے کہا کہ بھارت نہ صرف مقبوضہ کشمیر بلکہ سکھ٬ عیسائیوں اور ہندو مذہب کی مختلف برادریوں پر بھی مظالم ڈھا رہا ہے۔ اقوام متحدہ کو اپنی قراردادوں پر فوری عملدرآمد کرانا چاہیے۔

ایسی کون سی عدالت ہے جہاں 70 سال تک کیس کا فیصلہ نہ ہو۔ معروف گلوکار عمیر جسوال نے کہا کہ مقبوضہ کشمیر میں بھارتی مظالم کے خلاف وہ میدان میں آگئے ہیں۔ انہوں نے کہا کہ انہیں افسوس ہے کہ پاکستانی بہت سے فنکار ان مظالم پر خاموشی اختیار کیے ہوئے ہیں لیکن انہیں اب اپنی یہ خاموشی توڑنی چاہیے۔ عمیر جسوال نے کہا کہ فیس بک پیج پر کشمیر کا اسٹیٹس لگانے پر بھارتی شہریوں کی ایک بڑی تعداد نے انہیں ان فالو کردیالیکن انہیں اس کی بھی کوئی پرواہ نہیں ہے۔

انہوں نے کہا کہ وہ بھارتی عوام کو بھی بتانا چاہتے ہیں کہ ایک کروڑ لوگ دہشت گرد نہیں ہو سکتے٬ انہیں خاموش نہیں کیا جا سکتا٬ ان کی آواز کو دبایا نہیں جا سکتا۔ وہ ہمارے بھائی اور حصہ ہیں۔ ہمارے لیے سب سے پہلے پاکستان ہے۔ ایک سوال کے جواب میں انہوں نے کہا کہ ہر فنکار ٬ گلوکار یہیں اپنی سرزمین پر بڑا ہوا ہے پھر اسے بھارت سے آفر آتی ہے۔ لوگ شاید اب بھی یہی سوچ رہے ہیں کہ انہیں بھارت میں عزت ملے گی تو انہیں اپنی سوچ بدلنی چاہیے۔ فنکاروں کو سوچنا چاہیے کہ انہیں پاکستان نے پالا ہے٬ نام دیا ہے٬پہلے بھی عزت یہیں سے ملی تھی اور اب بھی ملے گی۔ اپنے لوگوں کا سوچیں اور خاموشی توڑیں۔ عمیر جسوال نے کہا کہ یہ گانا عالمی سطح پر کشمیریوں کے انسانی حقوق کی آواز بنے گا۔