Live Updates

حکومت کا سیلاب اور مہنگائی سے بے حال عوام پر نیا ٹیکس لگانے کا فیصلہ

شہباز شریف حکومت نے آئی ایم ایف سے نیا ٹیکس لگانے کی اجازت مانگ لی

محمد علی جمعہ 12 ستمبر 2025 20:13

لاہور (اُردو پوائنٹ اخبارتازہ ترین۔ 12 ستمبر2025ء) حکومت کا سیلاب اور مہنگائی سے بے حال عوام پر نیا ٹیکس لگانے کا فیصلہ، شہباز شریف حکومت نے آئی ایم ایف سے نیا ٹیکس لگانے کی اجازت مانگ لی۔ تفصیلات کے مطابق اسلام آباد میں 213 ارب روپے لاگت سے جناح میڈیکل کمپلیکس کی تعمیر کے لیے حکومت نے بین الاقوامی مالیاتی فنڈ (آئی ایم ایف)سے نیا میونسپل ٹیکس لگانے کی اجازت مانگ لی۔

جناح میڈیکل کمپلیکس کا منصوبہ تین سال میں فنڈز اکٹھے کرنے کی شرط کے باعث مشکلات کا شکار ہے۔ آئی ایم ایف نے منصوبے کی مزید تفصیلات طلب کی ہیں، جبکہ عالمی مالیاتی ادارے کا فنڈ مشن 25 ستمبر سے 8 اکتوبر تک اسلام آباد میں قیام کرے گا۔ فنڈنگ مسائل کے حل کے لیے ای سی این ای سی نے کمیٹی تشکیل دے دی ہے اور متبادل طور پر ہنگامی بجٹ سے 30 ارب روپے جاری کرنے پر غور کیا جا رہا ہے۔

(جاری ہے)

وزارت خزانہ نے منصوبے کے لیے میونسپل ٹیکس کے ذریعے وسائل اکٹھے کرنے کی تجویز پیش کی ہے۔ جناح میڈیکل کمپلیکس میں ایک ہزار بستروں کے ساتھ جدید سہولتیں شامل ہوں گی، حکومت اسے 2028 کے وسط تک مکمل کرنے کی خواہاں ہے۔ منصوبے کے لیے ابتدائی ساڑھے تین ارب روپے کمپنی کے قیام اور بھرتیوں کے لیے جاری کیے جائیں گے۔ اس سے قبل، وزیراعظم شہباز شریف نے وزارتِ خزانہ کو ہدایت دی ہے کہ وہ بین الاقوامی مالیاتی فنڈ (آئی ایم ایف) سے سیلاب زدہ علاقوں میں بجلی کے بلوں میں ایک ماہ کے استثنا کی تجویز پر بات کرے۔

ذرائع کے مطابق آئی ایم ایف کی منظوری کے بعد یہ ریلیف پورے ملک کے سیلاب متاثرہ علاقوں میں دیا جائے گا۔ وزیراعظم کا کہنا ہے کہ اس اقدام سے متاثرین کو فوری ریلیف فراہم کیا جا سکے گا۔