پشاورسمیت خیبرپختونخوا کے بیشتر اضلاع میں بارش کا سلسلہ وقفے وقفے سے جاری ،سردی کی شدت میں اضافہ

پشاور(اُردو پوائنٹ اخبارتازہ ترین - این این آئی۔ 04 فروری2017ء) پشاورسمیت خیبرپختونخوا کے بیشتر اضلاع میں بارش کا سلسلہ وقفے وقفے سے جاری ہے،بارش سے سردی کی شدت میں اضافہ ہوگیا۔خیبرپختونخواہ سمیت فاٹا میں آئندہ چوبیس گھنٹوں میں مزید بارش کا امکان ہے پشاور اور گرد و نواح سمیت خیبر پختونخوا کے مختلف اضلاع میں بارش کا سلسلہ رات سے جاری ہے ،بارش کے بعد سردی کی شدت میں اضافہ ہوگیا ہے ،شانگلہ میں جاری بارش کے باعث شاہراہ قراقرم شوری نالہ لوٹر کے مقام پر لینڈ سلائیڈنگ کے باعث ہر قسم کی ٹریفک کیلئے بندہوگئی ہے،لکی مروت اور گرد نواح میں رات سے مسلسل بارش کا سلسلہ جاری ہے جس کے باعث سردی کی شدت میں اضافہ ہوا ہے ،اسی طرح بنوں،دیر،کرک،ہنگو،چارسدہ،مردان اور نوشہرہ میں بھی بارش کا سلسلہ وقفے وقفے سے جاری ہے ،محکمہ موسمیات کے مطابق گزشتہ چوبیس گھنٹوں میں چترال47، میرخانی 20، دروش1، کالام،پاراچنار 10، بنوں05، پشاور(ائیرپورٹ03 ،شہر میں ایک ملی میٹر ، ڈی آئی خان، کوہاٹ اور رسالپور میں 01 ملی میٹربارش ریکارڈ کی گئی جبکہ چترال 09 اورکلام میں 06 انچ برفباری ہوئی۔

(جاری ہے)

خیبر پختونخوا میں سرد ترین مقامات کے درجہ حضرارت میں پاراچنارمنفی06، قلات، گوپس، مالم جبہ، سکردو منفی 02، استور، کالام، دروش میں منفی 01 ڈگری سینٹی گریڈ ریکارڈ کیا گیا۔محکمہ موسمیات کے مطابق خیبرپختونخواہ سمیت فاٹا میں آئندہ چوبیس گھنٹوں میں مزید بارش کا امکان ہے۔وقفے وقفے سے بارش کے باعث بالائی خیبرپختونخواہ، فاٹا،گلگت بلتستان اورکشمیر کے پہاڑی علاقوں میں لینڈ سلائیڈنگ کا خدشات بھی ظاہر کیے گئے ہیں۔