رمضان المبارک ہمیں معاشرے کے غریبوں ناداروں ، یتیموں اور بیوائوں کا خاص خیال رکھنے کا درس دیتا ہے، سردار مسعود خان

اسلام آباد ۔ (اُردو پوائنٹ اخبارتازہ ترین - اے پی پی۔ 10 جون2017ء) صدر آزاد جموں و کشمیر سردار مسعود خان نے پوری قوم اور اُمت مسئلہ پر زور دیا ہے کہ یتیموں کا خاص رکھا جائے ۔ رمضان المبارک میں روزہ ہمیں بھوک اور پیاس کی شدت کا اس لیے احساس دلاتا ہے تاکہ ہم رمضان کے بعد بھی معاشرے کے غریب نادار ، یتیموں اور بیوائوں کا خاص خیال رکھیں , اپنے بچوں کے لیے جو چیز پسند کریں کوشش کرنی چاہیے کہ وہ کسی یتیم بچے کو بھی لے کر دی جائے ۔

او آئی سی کے عالمی یوم الیتامیٰ کے موقعہ پر ایک پیغام میںصدر سردار مسعود خان نے کہا کہ یہ ہمارے عہد کا المیہ ہے کہ ہر سال دنیا بھر میں ہزاروں بچے یتیم ہو رہے ہیں۔ جن کے والدین جنگوں ، نقل مکانی ، قدرتی آفات ، ٹریفک حادثات ، بیماریوں اور غربت کی وجہ سے لقمہ اجل بن رہے ہیں۔

(جاری ہے)

بحیثیت بنی نوع انسان ہمیں چاہیے کہ کسی صورت ان یتیموں کو نہ بھولا جائے ۔

اس لیے او آئی سی نے 15 رمضان المبارک کا دن ان یتیموں کے نام وقف کیا ہے جس کا مقصد ان یتیموں کی جانب دنیا کی توجہ دلانا ہے ۔ صدر آزاد کشمیر نے کہا کہ اسلام اور دیگر تمام مذاہب نے بچوں کے حقوق کا خیال رکھنے پر زور دیا ہے ۔ اس وقت شام ، عراق ، یمن ، سوڈان ، لیبیا ، صومالیہ ، اور افغانستان میں لاکھوں بچے یتیم ہو چکے ہیں۔ جن کے حقوق کا خیال رکھنا اُمت مسلمہ کی ذمہ داری ہے ۔