کراچی کے مختلف علاقوں میں بوندا باندی اور ٹھنڈی ہوائیں چلنے سے موسم خوشگوار ہوگیا

کراچی ۔ (اُردو پوائنٹ اخبارتازہ ترین - اے پی پی۔ 10 جولائی2017ء) کراچی کے مختلف علاقوں میں بوندا باندی اور ٹھنڈی ہوائیں چلنے سے موسم خوشگوار ہوگیا،مون سون کا نیا سلسلہ جمعرات تک جاری رہے گا۔اتوار اور پیر کی درمیانی شب شارع فیصل، ایم اے جناح روڈ ،نارتھ کراچی، نارتھ ناظم آباد، ناظم آباد، فیڈرل بی ایریا، گلشن اقبال، لیاقت آباد، تین ہٹی، گرومندر، نمائش، لسبیلہ، صدر، اردو بازار، آئی آئی چندریگر روڈاور قریبی علاقوں میں وقفہ وفقہ سے بونداباندی ہوتی رہی جبکہ ڈیفنس، ارساز، بلوچ کالونی، محمودآباداوردیگرعلاقوں میںکہیں کہیں تیز بارش ہوئی۔

بونداباندی کے ساتھ ہی شہر کے مختلف علاقوں میں بجلی نے آنکھ مچولی شروع کردی۔دوسر جانب محکمہ موسمیات نے ملک بھرمیں رواں ہفتے مون سون کی مزیدبارشوں کی نوید سنادی ہے۔

(جاری ہے)

محکمہ موسمیات نے بالائی پنجاب اور کشمیر میں آج سیجبکہ خیبرپختونخوا، فاٹا، گلگت بلتستان، اورجنوبی پنجاب میں کل سے گرج چمک کے ساتھ بارش کی پیشگوئی کردی ہے۔جمعرات تک جاری رہنے والے مون سون بارشوں کے اس سلسلے میں کہیں کہیں موسلادھار بارش بھی ہوسکتی ہے۔

محکمہ موسمیات کے مطابق بارشوں کے باعث اسلام آباد، راولپنڈی، گوجرانوالہ، ڈی جی خان ڈویژن، خیبرپختونخوا اور کشمیر کے برساتی نالوں میں طغیانی جبکہ نشیبی علاقے زیرآب آنے کا خدشہ ہے۔جب کہ مالاکنڈ، ہزارہ ڈویژن، گلگت بلتستان اور کشمیر کے پہاڑی علاقوں میں لینڈ سلائیڈنگ کابھی خدشہ ہے۔