رواں ہفتے کے دوران ملک کے مختلف علاقوں میں بارش اور پہاڑوں پر برفباری ہوگی، محکمہ موسمیات

اسلام آباد ۔ (اُردو پوائنٹ اخبارتازہ ترین - اے پی پی۔ 13 نومبر2017ء) رواں ہفتے کے دوران راولپنڈی اسلام آباد سمیت ملک کے مختلف علاقوں میں گرج چمک کے ساتھ موسم سرما کی بارش جبکہ پہاڑوں پر برفباری ہوگی، اس دوران بارش اور درجہ حرارت میں کمی کے باعث شہری علاقوں میں چھائی ہوئی سموگ بھی بتدریج ختم ہو جائے گی۔ محکمہ موسمیات کے مطابق آئندہ بدھ تک خیبرپختونخوا، فاٹا، اسلام آباد، بالائی پنجاب (راولپنڈی، سرگودھا، گوجرانوالہ، لاہور، فیصل آباد، ساہیوال ڈویژن)، کشمیر، گلگت بلتستان میں کہیں کہیں گرج چمک کے ساتھ بارش اور پہاڑوں پر برفباری جبکہ جنوبی پنجاب (ملتان، ڈی جی خان، بہاولپور ڈویژن) میں چند مقامات پر بارش کا امکان ہے۔

شہری علاقوں میں چھائی ہوئی سموگ رواں ہفتے بارش اور درجہ حرارت میں کمی کے باعث بتدریج ختم ہو جائے گی۔

(جاری ہے)

آئندہ 24 گھنٹوں کے دوران کوئٹہ سمیت بلوچستان، خیبرپختونخوا، فاٹا، اسلام آباد، بالائی پنجاب (راولپنڈی، لاہور، گوجرنوالہ، فیصل آباد، سرگودھا ڈویژن)، کشمیر اور گلگت بلتستان میں کہیں کہیں جبکہ ڈی جی خان، ملتان، ساہیوال، بہاولپور، کراچی، سکھر، لاڑکانہ ڈویژن میں چند مقامات پر گرج چمک کے ساتھ بارش اور پہاڑوں پر برفباری کا امکان ہے جبکہ پنجاب کے میدانی علاقوں میں صبح کے وقت شدید دھند/سموگ پڑنے کا امکان ہے۔

گذشتہ 24 گھنٹوں کے دوران ملک کے بیشتر علاقوں میں موسم خشک رہا جبکہ پنجاب کے میدانی علاقے شدید دھند جبکہ سکھر، ڈی آئی خان اور پشاور ڈویژن دھند کی لپیٹ میں رہے۔ اس کے علاوہ کوئٹہ ڈویژن میں چند مقامات پر ہلکی بارش ہوئی۔ سب سے زیادہ بلوچستان میں نوکنڈی میں 01 ملی میٹر بارش ریکارڈ کی گئی۔ اس دوران ملک میں سب سے زیادہ سردی سکردو میں پڑی جہاں کم سے کم درجہ حرارت منفی 05 ڈگری سینٹی گریڈ رہا جبکہ گلگت، کالام اور استور میں کم سے کم درجہ حرارت صفر ڈگری سینٹی گریڈ ریکارڈ کیا گیا۔