سرد ہوائوں نے کراچی میں ڈیرے ڈال لئے ، کل درجہ حرارت15 ڈگری تک گرنے کا امکان

کراچی(اُردو پوائنٹ اخبارتازہ ترین - آئی این پی۔ 17 نومبر2017ء) محکمہ موسمیات نے پیش گوئی کی ہے کہ ہفتے کو (کل)کراچی کا درجہ حرارت 15 ڈگری سینٹی گریڈ تک گرسکتا ہے۔شہر قائد میں گرمی کے طویل دورانیے کے بعد اب سرد ہواؤں نے ڈیرے ڈال لیے ہیں۔ گرمی کی شدت کم ہونے کی وجہ سے موسم کی سختی کم ہوگئی ہے جس کے باعث شہریوں نے بھی سکون کا سانس لیا ہے۔ شہر میں گزشتہ کئی روز سے سرد ہوائیں چلنے کے باعث ٹھنڈ بڑھ گئی ہے جب کہ محکمہ موسمیات نے کراچی میں درجہ حرارت مزید کم ہونے کی پیش گوئی کردی ہے۔

(جاری ہے)

محکمہ موسمیات نے کہا ہے کراچی میں سردی اور خنکی میں اضافہ بلوچستان کی سمت سے آنے والی شمال مشرقی ہواؤں کی وجہ سے ہوا ہے۔ آئندہ چند روز میں شہر کی فضاؤں میںخشکی مزید بڑھ جائے گی جب کہ ہفتے کے روز کم سے کم درجہ حرارت 15 ڈگری سینٹی تک گرسکتا ہے لہٰذا شہری احتیاط کریں اور گرم کپڑوں کا استعمال شروع کردیں۔دوسری جانب شہر میں ٹھنڈ اور سردی میں اضافے کے باعث لوڈشیڈنگ کے دورانیے میں بھی کمی آگئی ہے جس کے باعث شہری بہت خوش ہیں۔ واضح رہے کہ جمعہ کو شہر کا کم سے کم درجہ حرارت 17 سینٹی گریڈ ریکارڈ کیا گیا ہے۔#