آصف علی زرداری سے خیبرپختونخوا کی ممتاز سیاسی شخصیات کی ملاقات ،

پیپلزپارٹی میں شمولیت کا اعلان نوابزادہ محسن علی خان، پی ٹی آئی حیات آباد کے صدر ڈاکٹر الیاس خٹک اور اے این پی کے رہنما افراسیاب خٹک کے بھتیجے مطیع اللہ خٹک شامل ہیں

پیر اپریل 21:15

آصف علی زرداری سے خیبرپختونخوا کی ممتاز سیاسی شخصیات کی ملاقات ،
اسلام آباد (اُردو پوائنٹ اخبارتازہ ترین۔ 16 اپریل2018ء) سابق صدرپاکستان اور پاکستان پیپلزپارٹی پارلیمنٹیرین کے صدر آصف علی زرداری سے خیبرپختونخوا کی ممتاز سیاسی شخصیات نے زرداری ہائوس اسلام آباد میں ملاقات کرکے پاکستان پیپلزپارٹی میں شمولیت کا اعلان کیا۔ پیپلزپارٹی میں شمولیت اختیار کرنے والوں میں سابق وفاقی وزیر خزانہ نوابزادہ محسن علی خان، پی ٹی آئی حیات آباد کے صدر ڈاکٹر الیاس خٹک اور اے این پی کے رہنما افراسیاب خٹک کے بھتیجے مطیع اللہ خٹک شامل ہیں۔

اس موقع پر سابق وزیراعظم سید یوسف رضا گیلانی، پیپلزپارٹی کے پی کے صدر ہمایوں خان، سابق وفاقی وزیر لال خان اور دیگر رہنما بھی موجود تھے۔ پیپلزپارٹی میں شمولیت اختیار کرنے والوں نے صدر آصف علی زرداری اور چیئرمین بلاول بھٹو زرداری کی قیادت پر مکمل اعتماد کا اظہار کرتے ہوئے کہا کہ پاکستان پیپلزپارٹی کی قیادت نے قوم سے جو وعدے کئے وہ پورے کئے۔

(جاری ہے)

صدر آصف علی زرداری نے کے پی کے عوام کو شناخت دی۔ آج پختون عوام پوری دنیا میں فخر سے کہہ سکتے ہیں کہ ہمارا تعلق پختونخوا سے ہے۔ ان رہنمائوں نے کہا کہ قائدعوام ذوالفقار علی بھٹو شہید اور محترمہ بینظیر بھٹو شہید نے پختون عوام کے لئے تاریخی کام کئے ہیں۔ یہ کہنا درست ہوگا کہ باقی سیاسی پارٹیوں نے صرف کھوکھلے دعوے کئے ہیں جبکہ پیپلزپارٹی نے صحیح معنوں میں عوام کی خدمت کی ہے۔ صدر آصف علی زرداری نے پارٹی میں شمولیت اختیار کرنے والوں کو خیرمقدم کیا۔