آزاد کشمیر میں مسلم لیگ (ن ) حکومت راجہ فاروق حیدرکی قیادت میں زندگی کے ہر شعبہ زندگی میں بہتری لانے کیلئے عمل پیرا ہے ،ْ محمد اسحق چوہدری

تعلیمی نظام میں مزید بہتری کیلئے این ٹی ایس کا قیام کر کے آزاد کشمیر پبلک سروس کمیشن میں دیانتدارلوگوں کو شامل کر کے ایک نئی مثال قائم کی ہے ،ْوزیر جیلخانہ جات

جمعرات 19 اپریل 2018 16:06

مظفرآباد(اُردو پوائنٹ اخبارتازہ ترین - این این آئی۔ 19 اپریل2018ء) آزاد کشمیر حکومت کے وزیر جیلخانہ جات محمد اسحق چوہدری نے کہا ہے کہ آزاد کشمیر میں مسلم لیگ (ن )کی موجودہ حکومت وزیر اعظم آزاد کشمیر راجہ فاروق حیدر خان کی ولولہ انگیز قیادت میں زندگی کے ہر شعبہ زندگی میں بہتری لانے کے لیے عمل پیرا ہے اور حکومتی محکمہ جات کی استعداد کار کو بہتر بنانے پر بھی خصوصی توجہ دی جارہی ہے۔

ان خیالات کا اظہار انہوں نے ایک نجی سکول کی تقریب سے بطور مہمان خصوصی اپنے خطاب کے دوران کیا۔ اس موقع پر انہوں نے مزید کہا کہ آزاد کشمیر میں تعلیم اور صحت عامہ اور ذرائع رسل و رسائل اور مواصلات کے شعبہ کی تعمیر وترقی پر خصوصی توجہ دی جارہی ہے ۔ انہوں نے کہا کہ تعلیم کے بغیر کوئی بھی قومی ترقی کی منازل طے نہیں کر سکتی۔

(جاری ہے)

آزاد کشمیر کا لٹریسی ریٹ پاکستان سے بہتر ہے ۔

آزاد کشمیر میں مسلم لیگ (ن )کی حکومت نے تعلیمی نظام میں مزید بہتری کے لیے این ٹی ایس کا قیام کر کے آزاد کشمیر پبلک سروس کمیشن میں قابل اور دیانتدارلوگوں کو شامل کر کے ایک نئی مثال قائم کی ہے ۔ جس کے دور رس نتائج مرتب ہوں گے ۔ مقبوضہ کشمیر میں بھارتی اندوہناک مظالم کو زبردست الفاظ میں ہدف تنقید بناتے ہوئے چوہدری محمد اسحق وزیر حکومت آزاد کشمیر نے کہاکہ مقبوضہ کشمیر میں کشمیری آج اپنی آزادی کے حق کے لیے آواز اٹھار ہے ہیں۔ جبکہ بھارت وہاں دہشتگردی کا مرتکب ہورہا ہے ۔ کشمیریوں کی پرامن جدوجہد کے خلاف بے بنیاد پروپیگنڈہ کرنا بھارت کی پالیسی ہے ۔