ایوان بالاء میں قائمہ کمیٹیوں کے قیام کا عمل شروع، سینیٹر آغا شاہ زیب خان درانی قائمہ کمیٹی برائے منصوبہ بندی و ترقیات کے بلا مقابلہ چیئرمین منتخب

جمعرات 19 اپریل 2018 18:01

اسلام آباد ۔ (اُردو پوائنٹ اخبارتازہ ترین - اے پی پی۔ 19 اپریل2018ء) ایوان بالاء میں قائمہ کمیٹیوں کے قیام کا عمل شروع، سینیٹر آغا شاہ زیب خان درانی کوقائمہ کمیٹی برائے منصوبہ بندی و ترقیات کے بلا مقابلہ چیئرمین منتخب کرلیا گیا, چیئرمین کمیٹی کیلئے نام قائد ایوان سینیٹ راجہ محمد ظفرالحق نے تجویز کیا جس کی تائید سینیٹر ڈاکٹر اسد اشرف نے کی۔

چیئرمین قائمہ کمیٹی سینیٹر آغا شاہ زیب خان درانی نے منتخب ہونے پر تمام ممبران کا شکریہ ادا کرتے ہوئے کہا کہ ممبران کی مشاورت سے بہترین تجاویز و سفارشات پیش کی جائیں گی۔

(جاری ہے)

قائد ایوان سینیٹ راجہ محمد ظفرالحق نے اس امید کااظہار کیا کہ تمام ممبران کی مشاورت سے ایجنڈا اور کمیٹی اجلاس کی تاریخ طے کر کے مثبت تجاویز دی جائیں گی۔ قائد حزب اختلاف شیری رحمان نے کہا کہ جس خوش اسلوبی سے قائمہ کمیٹیوں کے قیام کا عمل شروع ہے ایوان میں بھی اسی طرح کا کردار ادا کرنے کی ضرورت ہے ۔

اجلاس میں قائد ایوان سینیٹ راجہ محمد ظفرالحق، قائد حزب اختلاف شیری رحمان اور سینیٹرز ہدایت اللہ ،شبلی فراز ، ڈاکٹر اسد اشرف، محمد طلحہ محمود ، رخسانہ زبیری ، گیان چند کے علاوہ ایڈیشنل سیکرٹری سینیٹ ڈاکٹر پرویز عباس نے شرکت کی۔