وفاقی وزیرتجارت سے کارپوریٹ ڈیری فارمرز ایسوسی ایشن کے وفد کی ملاقات

ہفتہ 9 مئی 2026 12:29

اسلام آباد (اُردو پوائنٹ اخبارتازہ ترین - اے پی پی۔ 09 مئی2026ء) وفاقی وزیر تجارت جام کمال خان سے کارپوریٹ ڈیری فارمرز ایسوسی ایشن کے وفد کی ملاقات کی اور ڈیری اور لائیو اسٹاک شعبے میں سرمایہ کاری اور ترقی سے متعلق بریفنگ دی۔ وزارت تجارت کے مطابق کارپوریٹ ڈیری فارمز میں جدید ٹیکنالوجی اور سائنسی طریقوں کے استعمال سے پیداوار میں اضافہ ہوا ہے۔

وفد نے بتایا کہ پاکستان میں عالمی معیار کے مطابق دودھ اور ویلیو ایڈڈ ڈیری مصنوعات تیار کی جا رہی ہی،ڈیری شعبہ درآمدی متبادل، روزگار اور فنی مہارت کے فروغ میں اہم کردار ادا کر رہا ہے۔ بریفنگ میں کہا گیا کہ آسٹریلیا، امریکہ، کینیڈا اور یورپ کی جدید مہارت سے ڈیری سیکٹر کو فائدہ پہنچا ہے۔ملاقات کے دوران گفتگو کرتے ہوئے وفاقی وزیر تجارت جام کمال خان نے کہا کہ پاکستان کے ڈیری اور لائیو اسٹاک شعبے میں بے پناہ ترقی کی صلاحیت موجود ہے، ڈیری شعبے کی ترقی کیلئے آسان فنانسنگ اور سرمایہ تک رسائی ضروری ہے۔

(جاری ہے)

انہوں نے کہا کہ بہتر مالی معاونت سے ڈیری مصنوعات کی پیداوار اور برآمدات میں اضافہ ممکن ہے۔ جام کمال خان نے کہا کہ اصل مسئلہ پالیسی نہیں بلکہ اس پر مؤثر عملدرآمد ہے۔ وفاقی وزیر تجارت نے کہا کہ حکومت کاروباری سہولت اور بہتر عملدرآمد کیلئے اقدامات کر رہی ہے، حکومت اور نجی شعبے کا تعاون برآمدات اور فوڈ سکیورٹی کیلئے اہم ہے۔ انہوں نے مزید کہا کہ کارپوریٹ ڈیری فارمز جدید فارمنگ اور ویٹرنری نظام متعارف کرا رہے ہیں۔

جام کمال خان نے کہا کہ اونٹنی کے دودھ اور لائیو اسٹاک کے نئے شعبوں میں سرمایہ کاری کے مواقع پر بھی غور کی ضرورت ہے۔ جام کمال خان نے کہا پاکستان کے مختلف علاقے اونٹ فارمنگ کیلئے موزوں ہیں۔وزیر تجارت نے ایسوسی ایشن سے ٹیکس، فنانسنگ، ویکسین اور برآمدات سے متعلق تجاویز طلب کر تے ہوئے کہا کہ حکومت ڈیری اور لائیو اسٹاک شعبے کی ترقی اور برآمدات کے فروغ کیلئے پرعزم ہے۔