پشاور، تحریک انصاف نے حقیقی جمہوریت اورمیرٹ کی اعلی مثال قائم کرتے ہوئے عوام کے ووٹ کوعزت دی ہے، محمدعاطف خان

پشاور(اُردو پوائنٹ اخبارتازہ ترین - آن لائن۔ 19 اپریل2018ء) صوبائی وزیرتعلیم وتوانائی محمدعاطف خان نے کہاہے کہ پاکستان تحریک انصاف نے حقیقی جمہوریت اورمیرٹ کی اعلی مثال قائم کرتے ہوئے عوام کے ووٹ کوعزت دی ہے۔ ہمارے پانچ سالہ دورحکومت میں جہاں عوام کے مسائل حقیقی معنوںمیں حل ہوچکے ہیں وہاں پرمیرٹ کی سربلندی اوراداروں کی بحالی کیلئے عملی اقدامات بھی کئے گئے ہیں۔

وہ گرداس کلے گلی باغ مردان میں شمولیتی جلسے سے خطاب کررہے تھے ۔ جس سے ممبرقومی اسمبلی مجاہدخان اورڈسٹرکٹ کونسل کے رکن شیربہادر نے بھی خطاب کیا۔ اس موقع پرحاجی زیارت گل ، حاجی زمین خان، حاجی مشال خان، ارسلان، وکیل رحمت علی اورتاج علی نے درجنوں ساتھیوں سمیت جے یوآئی سے مستعفی ہوکر پی ٹی آئی میں شمولیت کااعلان کیا۔

(جاری ہے)

محمدعاطف خان نے کہا کہ عمران خان نے عوام کوشعوردیااور اب وہ کھوکھلے نعروں اوروعدوں میں آنے والے نہیں۔

انہوں نے حقیقی تبدیلی کی جھلک خیبرپختونخوا میں دیکھ لی ہے ۔ انہوں نے کہاکہ پاکستان تحریک انصاف میں ہر عمر اورہرمکتبہ فکر کے لوگ جوق درجوق شمولیت اختیارکررہے ہیں جو اس بات کی عکاس ہے کہ عمران خان ہی امیدکی آخری کرن ہے۔ صوبائی وزیرتعلیم نے کہاکہ سابقہ حکومتوں نے عوام کاپیسہ بے دردی سے لوٹ کر اپنی تجوریاں بھری ہیں جبکہ پاکستان تحریک انصاف کی صوبائی حکومت کی وجہ سے نہ صرف ملک خاص کر صوبے میں امن قائم ہوا بلکہ صوبے میں کرپشن، رشوت، چوری اورکمیشن کا مکمل طورپر خاتمہ بھی کیاگیااورآج صوبے میں تمام ترفیصلے میرٹ پرہوتے ہیں۔

انہوں نے کہاکہ آنے والے الیکشن میں ووٹ ڈالتے وقت عوام ہمارے دورحکومت اورسابقہ ادوارکاضرورموازنہ کریں گے۔ اگر تبدیلی آئی ہے اورحقدار کو اس کا حق مل رہاہے توپھرووٹ صرف پاکستان تحریک انصاف کابنتاہے۔ محمدعاطف خان نے کہاکہ صحت، تعلیم ،پولیس اورپٹوار نظام میں متعارف کردہ ہماری اصلاحات کی بدولت عوام کی زندگیوں میں حقیقی تبدیلیاں آئی ہیں اورہمیں امیدہے کہ سال 2018کے الیکشن میں پورے پاکستان میں حکومت بناکر اس ملک کو امن کاگہوارہ بنائیں گے۔ شکیل)