جامعہ کراچی کے ایسوسی ایٹ پروفیسر ڈاکٹر ریاض احمد کراچی میں پراسرار طور پر لاپتہ

کراچی یونیورسٹی سے پاکستان ایمپلائز کوآپریٹو ہاؤسنگ سوسائٹی میں واقع اپنے گھر کیلئے روانہ ہوئے تھے مگر گھر نہیں پہنچے یونیورسٹی حکام نے مبینہ ٹاؤن تھانے میں گمشدگی کی اطلاع کردی ،متعلقہ اداروں سے رابطے ،انجمن اساتذہ کا احتجاج کا اعلان

ہفتہ 12 مئی 2018 20:54

کراچی(اُردو پوائنٹ اخبارتازہ ترین - این این آئی۔ 12 مئی2018ء) کراچی یونیورسٹی کے شعبہ اپلائیڈ کیمسٹری کے چیئرمین اور ایسوسی ایٹ پروفیسر ڈاکٹر ریاض احمد کراچی میں پراسرار طور پر لاپتہ ہوگئے ہیں ۔جامعہ کراچی کی ٹیچرز ایسوسی ایشن کے صدر ڈاکٹر جمیل کاظمی کے مطابق ڈاکٹرریاض احمد گزشتہ روز 9بجے کے بعد کراچی یونیورسٹی سے پاکستان ایمپلائز کوآپریٹو ہاؤسنگ سوسائٹی میں واقع اپنے گھر کے لیے روانہ ہوئے تھے مگر گھر نہیں پہنچے ۔

اہل خانہ کے مطابق ڈاکٹرریاض نے گزشتہ رات 8بجے اپنی اہلیہ سے فون پر رابطہ کیا تھا ۔کراچی یونیورسٹی کی ٹیچرز ایسوسی ایشن کے صدر جمیل کاظمی کی رات 9بج کر 35منٹ پر آخری بار ڈاکٹر ریاض سے بات ہوئی تھی ،اس وقت وہ یونیورسٹی میں تھے ۔اس کے بعد سے ان کا موبائل فون بھی بند ہے ۔

(جاری ہے)

یونیورسٹی ذرائع کے مطابق گذشتہ سال بھی ایک ادارے نے ڈاکٹر ریاض احمد کو حراست میں لیا تھا تاہم کچھ دن بعد انہیں رہا کردیا گیا تھا ۔

ان کے خاندانی ذرائع کے مطابق یونیورسٹی حکام نے مبینہ ٹاؤن تھانے میں ان کی گمشدگی کی اطلاع کردی ہے اور اس سلسلے میں متعلقہ اداروں سے بھی رابطہ کررہے ہیں ۔ڈاکٹر ریاض احمد کراچی کی انجمن اساتذہ کے سابق سیکرٹری بھی رہے ہیں ۔ان کی گمشدگی پر انجمن اساتذہ نے احتجاج کا اعلان کیا ہے ۔