Live Updates

ایم ڈی کیٹ امتحان ڈومیسائل کی بنیاد پر لینے کا فیصلہ

ہرطالبعلم اپنے ڈومیسائل کے مطابق متعلقہ صوبے میں ٹیسٹ دے گا

بدھ 17 ستمبر 2025 14:58

ایم ڈی کیٹ امتحان ڈومیسائل کی بنیاد پر لینے کا فیصلہ

لاہور (اُردو پوائنٹ اخبارتازہ ترین - این این آئی۔ 17 ستمبر2025ء)پاکستان میڈیکل اینڈ ڈینٹل کونسل (پی ایم ڈی سی)نے میڈیکل و ڈینٹل کالجز میں داخلہ کے لئے ایم ڈی کیٹ امتحان ڈومیسائل کی بنیاد پر لینے کا فیصلہ کیا ہے۔ میڈیا رپورٹ کے مطابق ہر طالبعلم اپنے ڈومیسائل کے مطابق متعلقہ صوبے میں ٹیسٹ دے گا اور کسی دوسرے صوبہ میں امتحان نہیں دے سکے گا۔

فیصلے کے مطابق چاروں صوبوں اور اسلام آباد میں میڈیکل و ڈینٹل کالجز میں داخلہ کے لئے یونیورسٹیز کی منظوری دی گئی ہے،ان میں آئی بی سکھر، بولان یونیورسٹی آف میڈیکل اینڈ ہیلتھ سائنسزکوئٹہ اور اسلام آباد میں شہید ذوالفقار علی بھٹو میڈیکل یونیورسٹی شامل ہیں۔ سندھ اور بلوچستان کے امیدواروں کیلئے اسلام آباد میں ایک ایک سینٹر بنایا جائے گا جہاں وہ امتحان دے سکیں گے۔

(جاری ہے)

پنجاب اور خیبرپختونخوا ڈومیسائل کے حامل امیدوار اپنی یونیورسٹی کے سینٹرز پر امتحان دیں گے۔ شہید ذوالفقار علی بھٹو میڈیکل یونیورسٹی کے سینٹرز پر آزاد کشمیر، گلگت بلتستان اور چاروں صوبوں کے امیدوار بھی امتحان دے سکیں گے تاہم ان کے کوٹہ کے مطابق نشستیں مقرر کی گئی ہیں۔ پی ایم ڈی سی کے مطابق میڈیکل و ڈینٹل کالجز میں داخلہ کیلئے متعلقہ صوبہ کا ڈومیسائل لازمی ہو گا، آزاد کشمیر اور گلگت بلتستان کے رہائشیوں کیلئے بھی پاکستان کے میڈیکل و ڈینٹل کالجز میں نشستیں مختص ہیں۔

واضح رہے کہ وفاقی وزیر صحت مصطفی کمال کی ہدایت پر ملک بھر میں حالیہ سیلابی صورتحال کے پیش نظر پاکستان میڈیکل اینڈ ڈینٹل کونسل نے ایم ڈی کیٹ کے امتحان کا شیڈول تبدیل کردیا تھا۔ امتحان 5اکتوبر 2025ء کو منعقد ہونا تھا لیکن اب یہ امتحان 26اکتوبر 2025کو ہو گا۔